ԵՐԵՎԱՆ, 18 հոկտեմբերի — Sputnik. 64-ամյա գեներալ-լեյտենանտ Էնրիկո Ապրիամովին մտադիր են համակարգ վերադարձնել, ըստ ամենայնի՝ ԶՈՒ գլխավոր շտաբի պետի խորհրդական։ Այս մասին գրում է «Հրապարակ» օրաթերթը` հղում անելով Պաշտպանության նախարարության իր աղբյուրներին։
«Նա 2000-ից մինչև 2017-ը ԶՈՒ շտաբի պետի տեղակալ է եղել։ Նրա անունը շոշափվել է բազմաթիվ կոռուպցիոն պատմությունների մեջ, որոնցից ամենահնչեղը 2012-ին մի խումբ բարձրաստիճան զինվորականների կողմից ապօրինի զենք-զինամթերք վաճառելու գործն էր»,- գրում է թերթը։
Պարբերականը հիշեցնում է, որ 2017 թ․ մայիսի 3-ին Սերժ Սարգսյանի հրամանագրով նա ազատվել է ՀՀ ԶՈւ գլխավոր շտաբի պետի առաջին տեղակալի պաշտոնից և զորացրվել զինվորական ծառայությունից:
«Ապրիամովը մտերիմ է եղել Յուրի Խաչատուրովի, Միքայել Հարությունյանի հետ»,- նշված է հոդվածում։
Ներկայիս պաշտպանության նախարար Դավիթ Տոնոյանը 2017-ին նրան անգամ ԱԻՆ տարավ՝ իր տեղակալի պաշտոնում, որտեղից էլ ազատվեց այս տարվա մայիսին:
