ԵՐԵՎԱՆ, 18 հոկտեմբերի — Sputnik. Հայաստանում ԱՄՆ դեսպանի հայտարարությունը չի փոխում Հայաստանի արտաքին քաղաքականությունը։ Այս մասին այսօր կառավարության նիստից հետո լրագրողներին ասաց ՀՀ արտգործնախարար Զոհրաբ Մնացականյանը։
Ավելի վաղ ԱՄՆ-ի դեսպան Ռիչարդ Միլսը հարցազրույցներից մեկում ասել էր, որ ցանկացած կարգավորում պահանջում է գրավյալ տարածքների մի մասի վերադարձ։
Հարցին` արդյո՞ք այդ հայտարարությունը Մնացականյանի համար անսպասելի էր, նա պատասխանեց. «Մենք նման կատեգորիաներով չենք մտածում։ Մեր առջև կա արտաքին քաղաքական օրակարգ, որը մենք զարգացնում ենք»։
Նա ընդգծեց, որ Հայաստանը չի փորձում սառեցնել բանակցային գործընթացը։ Վերջին հինգ ամսվա ընթացքում Հայաստանի ու Ադրբեջանի արտգործնախարարները երկու անգամ հանդիպել են, իսկ ՀՀ վարչապետը հանդիպել է Ադրբեջանի նախագահի հետ։
