ԵՐԵՎԱՆ, 18 հոկտեմբերի — Sputnik, Արմենուհի Մխոյան. Ֆրիտյոֆ Նանսենի անվան երեխաների խնամքի և պաշտպանության թիվ 2 գիշերօթիկ հաստատության բակում հայտնաբերված երեխաներն այս պահին առողջ են ու ապահով։
Նրանք հատուկ հաստատություններից մեկում են։
Sputnik Արմենիային այս մասին հայտնեց Շիրակի մարզպետարանի երեխաների, կանանց և ընտանիքի իրավունքների բաժնի պետ Լիլիթ Գորգինյանը։
Հոկտեմբերի 17-ին, ժամը 19:30-ին hաստատության պահակը` Մնացական Առաքելյանը, գիշերօթիկ դպրոցի բակում դեղին տոպրակ է տեսել։ Քամի չի եղել, բայց նա նկատել է, որ տոպրակը շարժվում է։ Պահակը բացել է ու տեսել, որ տոպրակում 2 նորածիններ են։ Բացի պահակից, երեխաներին անմիջապես տեսել են ինչպես հաստատության աշխատակիցները, այնպես էլ սաները:
![Детский дом №2 им. Фритьофа Нансена, Гюмри Детский дом №2 им. Фритьофа Нансена, Гюмри - Sputnik Արմենիա](https://cdn.am.sputniknews.ru/img/1517/18/15171873_0:0:1600:1200_600x0_80_0_0_6aac56fce2da9e7f06bbc3162d4643b6.jpg)
«Հաստատության համար աշխատանքային ժամ էր, և բոլոր դաստիարակներն այդ ժամին հաստատությունում էին, աշխատանքային պրոցեսի մեջ: Կենտրոնական մուտքը բաց էր: Պահակը երեխաներով տոպրակը բերեց ներս ու զանգեց ինձ»,-Sputnik Արմենիային պատմեց հաստատության տնօրեն Անահիտ Կարապետյանը:
Տնօրենն անմիջապես զանգել է ՀՀ ոստիկանության անչափահասների բաժին։ Տեղեկացվել են նաև Շիրակի մարզպետարանի ընտանիքի, կանանց և երեխաների իրավունքների պաշտպանության բաժինը և համայնքի հոգաբարձության ու խնամակալության մարմինը: Համապատասխան գործողություններն իրականացնելուց հետո երեխաները տեղափոխվել են մեկ այլ հաստատություն:
Մեր այն հարցին, թե ինչ վիճակում էին երեխաները հայտնաբերվելու պահին, Կարապետյանն ասաց, որ մաքուր հագուստներով էին, նույնիսկ նոր փոխված տակդիրներով ու կուշտ:
«Երեխաները խնամված էին։ Մեզ մոտ գործընթացը մոտ 2 ժամ տևեց, իսկ նրանք շատ հանգիստ էին, ուտել չէին ուզում: Առաջին հայացքից երկվորյակ եղբայրներ են, նրանցից մեկը բավականին ակտիվ էր, մյուսը քնած էր: Շապիկներ, տոտիկներ կային նրանց հագին ու փաթաթված էին: Նույնիսկ նորածիններին բնորոշ կարմիր հետքեր չունեին մաշկի վրա: Հավանաբար մոտ 12-14 օրական էին»,- ասաց տնօրենը։
Նրա խոսքով` հագուստից կարելի էր ենթադրել, որ անտարբերության մատնված երեխաներ չեն եղել։
![Директор детского дома №2 им. Фритьофа Нансена Анаит Карапетян Директор детского дома №2 им. Фритьофа Нансена Анаит Карапетян - Sputnik Արմենիա](https://cdn.am.sputniknews.ru/img/1517/18/15171881_0:0:1461:1096_600x0_80_0_0_6b6e1e75166d4589304f4e52b8fc255d.jpg)
Ի դեպ, տոպրակում ոչ մի գրություն ու երկտող չի եղել: Թեև այդ ժամին բոլորը հաստատությունում արթուն են եղել, բայց ոչ մեկը չի նկատել, թե ով է երեխաներին բերել. խնամքի հաստատությունը տեսագրող սարքեր չունի:
Երեխաների խնամքի և պաշտպանության հաստատության տնօրենը վստահեցնում է՝ թեև աշխատանքի բերումով շատ ճակատագրերի ու դեպքերի է հանդիպել, բայց այս մեկը բոլորովին այլ էր:
«Ոչ միայն մենք` մեծահասակներս էինք հուզված, այլ նաև սաներն էին լաց լինում, գալիս էին, ուզում էին սիրել ու տեսնել երեխաներին, բայց ամենավատ վիճակում պահակն էր ու մեր սաներից մեկը` 17 տարեկան տղան, որը, փորձելով հուզմունքը թաքցնել, բավական վատ վիճակում հայտնվեց, և նրա համար նույնիսկ ստիպված էինք շտապօգնություն կանչել»,- ասաց Կարապետյանը:
Թե ինչու են երեխաներին բերել հենց այդ հաստատություն, այս պահին կարելի է միայն ենթադրել. ավելի ապահով է:
Հաստատության տնօրենն ուրախ է, որ երեխաները շուտ են հայտնաբերվել ու երկար չեն մնացել դրսում: