ԵՐԵՎԱՆ, 17 հոկտեմբերի — Sputnik, Մարիա Շելուդյակովա. Խաչատուրյան ավագ քույրերը, որոնք մեղադրվում են իրենց հոր սպանության մեջ, քննիչի թույլտվությամբ կարող են շփվել քրեական վարույթի մասնակիցների հետ։ Մոսկվայի քաղաքային դատարանը փոխել է առաջին ատյանի դատարանի որոշումը, որն արգելք էր սահմանել «բոլոր անձանց հետ շփման» վրա։ «Հիմա նրանց թույլ են տալիս շփվել, բայց միայն քննիչի համաձայնությամբ։ Պաշտպանող կողմը համաձայն է այդ որոշման հետ»,– նշել է Կրեստինայի փաստաբան Յարոսլավ Պակուլինը։
Սեպտեմբերի վերջին դատարանն ազատ է արձակել աղջիկներին և որպես խափանման միջոց ընտրել որոշակի գործողություններ կատարելու արգելքը։ Սպանված Միխայիլ Խաչատուրյանի հարազատները խնդրել են կալանքի տակ պահել նրանց, իսկ պաշտպանությունը` կրճատել նրանց վրա դրված արգելքների ցուցակը։
Փաստաբանի խոսքով` Խաչատուրյան քույրերը զարմացած են և վիրավորված Միխայիլի ազգականների արձագանքից։
«Աղջիկները պնդում են, որ շատ ազգականներ` հորաքույրը, հորեղբայրը և եղբայրը, իմացել են այն մասին, թե ինչ է արել Միխայիլը։ Նրանք ֆիզիկական բռնության ականատեսներ են եղել, տեսել են, թե ինչպես են քույրերին զենքով սպառնում։ Հիմա այդ փաստերը հերքվում են, բարեկամները կոպտորեն վիրավորում են աղջիկներին։ Հնարավոր է, որ ժամանակի ընթացքում մենք կհասկանանք, թե ինչու են նրանք դա անում», – եզրափակել է Պակուլինը։
Քննչական մեկուսարանից դուրս գալուց հետո Անգելինան և Մարիան ապրում են երեք տարբեր բնակարաներում, որոնք տրամադրել են ընտանիքի ընկերները։ Նրանք չեն կարող գիշերը լքել բնակության վայրը, ինչպես նաև օգտագործել ինտերնետ և բջջային կապ։
