ԵՐԵՎԱՆ, 16 հոկտեմբերի — Sputnik. «Ե՛վ իր ծրագրում, և՛ իր բուն ռազմավարության իրականացման մեջ կառավարությունը հաստատակամորեն հավատարիմ է եղել արտաքին քաղաքականության շարունակականությանը ինչպես երկկողմ, այնպես էլ բազմակողմ մակարդակներում` ուղղված տարածաշրջանային և միջազգային խաղաղության, կայունության և փոխլրացնող համագործակցության խթանմանը: Հայաստանի արտաքին քաղաքականությունը խիստ հայաստանակենտրոն է»:
Այս մասին Լյուքսեմբուրգում ԱլԳ նախարարական հանդիպմանն ասել է ՀՀ ԱԳ նախարար Զոհրաբ Մնացականյանը, տեղեկացնում են ԱԳՆ մամուլի ծառայությունից։
Նա ընդգծել է, որ համամիտ եմ իր գործընկեր Էլմարի Մամեդյարովի հետ՝ Լեռնային Ղարաբաղի հիմնախնդրի հանդիպումների լավ դինամիկայի առնչությամբ: «Անցած հինգ ամիսների ընթացքում արդեն երկու հանդիպում ունեցել ենք: Լավ հանդիպում է տեղի ունեցել Հայաստանի վարչապետի և Ադրբեջանի նախագահի միջև, որը նպաստել է դրական դինամիկային, և մենք նպատակադրված ենք ամրապնդել այն»,–ասել է Մնացականյանը:
Նա նկատել է, որ կարևոր առաջնահերթություն է շարունակել ուշադրության կենտրոնում պահել խաղաղության համար նպաստավոր մթնոլորտի ձևավորումը և խթանումը, որը ներառում է բազմաթիվ բաղադրիչներ՝ վստահության ամրապնդման միջոցառումները, ներառյալ դրանց վերաբերյալ նախորդ համաձայնությունների իրականացումը, իրավիճակի սրման դեմ ռիսկերի նվազեցման միջոցները: «Մենք պետք է կենտրոնանանք այս քայլերի վրա և իրական ջանքեր գործադրենք հակամարտության բոլոր կողմերի բնակչությանը խաղաղությանը նախապատրաստելու ուղղությամբ: Եվս մեկ շատ կարևոր առաջնահերթություն է ռազմատենչ հռետորաբանությունից և ատելության քարոզից ձեռնպահ մնալը:
Լեռնային Ղարաբաղի կարգավիճակը և անվտանգությունը մեր գլխավոր առաջնահերթություններն են։ Լեռնային Ղարաբաղը հակամարտության կողմ է՝ կարգավորման գործընթացում իր որոշիչ ձայնով, և պետք է առավել անմիջական ներգրավվածություն ունենա։ Եվ մենք, իհարկե, դրա մասին խոսում ենք»,–ասել է ՀՀ արտաքին գերատեսչության ղեկավարը ։
Զոհրաբ Մնացականյանը նշել է, որ Արևելյան գործընկերության 10-ամյակի հետ կապված, պետք է ուշադրություն դարձնենք անցյալի սխալները չկրկնելու վրա և պահպանենք նախաձեռնության էությունը` առաջին հերթին մարդկանց գործընկերություն՝ ուղղված մեր երկրներում կյանքի բարելավմանը և մեր հասարակությունների մերձեցմանը։
