ԵՐԵՎԱՆ, 16 հոկտեմբերի — Sputnik. ՀՀ նախագահ Արմեն Սարգսյանը ստորագրեց ՀՀ կառավարության հրաժարականն ընդունելու հրամանագիրը։ Այս մասին հայտնում է նախագահի մամուլի ծառայությունը։
«Հիմք ընդունելով Սահմանադրության 130-րդ հոդվածը` ընդունել Կառավարության հրաժարականը»,- նշված է հրամանագրում:
Հիշեցնենք` ՀՀ վարչապետ Նիկոլ Փաշինյանն այսօր հայտարարեց, որ հրաժարվում է պաշտոնից։
ՀՀ սահմանադրության 149 հոդվածը սահմանում է.
Վարչապետի հրաժարական ներկայացնելու կամ վարչապետի պաշտոնը թափուր մնալու այլ դեպքերում Կառավարության հրաժարականն ընդունվելուց հետո` յոթնօրյա ժամկետում, Ազգային ժողովի խմբակցություններն իրավունք ունեն առաջադրելու վարչապետի թեկնածուներ: Ազգային ժողովը վարչապետին ընտրում է պատգամավորների ընդհանուր թվի ձայների մեծամասնությամբ:
Վարչապետ չընտրվելու դեպքում քվեարկությունից յոթ օր հետո անցկացվում է վարչապետի նոր ընտրություն, որին մասնակցելու իրավունք ունեն պատգամավորների ընդհանուր թվի առնվազն մեկ երրորդի առաջադրած վարչապետի թեկնածուները: Եթե պատգամավորների ընդհանուր թվի ձայների մեծամասնությամբ վարչապետ չի ընտրվում, ապա Ազգային ժողովն արձակվում է իրավունքի ուժով:
Վարչապետի ընտրությունն անցկացվում է անվանական քվեարկությամբ:
Հանրապետության նախագահն անհապաղ վարչապետ է նշանակում Ազգային ժողովի կողմից ընտրված թեկնածուին:
