ԵՐԵՎԱՆ, 16 հոկտեմբերի – Sputnik. Նախկին ռեժիմի պաշտոնյաները նոր իշխանության օրոք նույնպես կարող են պաշտոններ զբաղեցնել։ Այս մասին այսօր խորհրդարանում ասաց ՀՀ առաջին փոխվարչապետ Արարատ Միրզոյանը` անդրադառնալով Հունան Պողոսյանին Սյունիքի մարզպետ նշանակելու փաստին։
Ութ տարի Պողոսյանը Հայաստանի Ոստիկանության պետի առաջին տեղակալն է եղել։ Սակայն, Միրզոյանն ավելացրեց, որ չի կարելի միայն այդ պատճառով նման մարդկանց «նախկիններ» անվանել ու վտարել հասարակական կյանքից։
«Մենք պատրաստ ենք համագործակցել այն մարդկանց հետ, որոնք բավականաչափ պրոֆեսիոնալ են ու քրեական անցյալ չունեն։ Իհարկե, նախկինում կարող են տարբեր բաներ եղած լինել։ Օրինակ, եղել են ոստիկաններ, որոնք, չէի ասի, որ ծեծում էին, բայց ոչ այդքան քաղաքակիրթ էին վարվում ինձ հետ ցույցերի ժամանակ։ Ուրիշ դեպքեր էլ են եղել։ Սակայն եթե չկան հանցանքներ, առավել ևս` ծանր հանցանքներ, ապա չի կարելի բացառել համագործակցությունն այդ մարդու հետ», – ավելացրեց Միրզոյանը։
Հիշեցնենք` ինքը` Պողոսյանը, պատասխանելով լրագրողների հարցերին կառավարությունում, հայտարարեց, որ ծառայել ու ծառայում է ոչ թե նախորդ կամ ներկայիս իշխանությանը, այլ ժողովրդին։
