ԵՐԵՎԱՆ, 14 հոկտեմբերի — Sputnik. Առեղծվածային դեպք է տեղի ունեցել Երևանում:
Երեկ ժամը 21:20-ի սահմաններում ոստիկանության կենտրոնական բաժին և ոստիկանության Մարաշի բաժանմունք ահազանգ է ստացվել, որ Նորք Մարաշ 7-րդ փողոցում՝ «Ընտանեկան» ռեստորանային համալիրի մոտ, արդեն մի քանի օր է՝ Ford մակնիշի ավտոմեքենա է կայանված:
Ինչպես հայտնում է shamshyan.com, դեպքի վայր են մեկնել ոստիկանության կենտրոնական բաժնի օպերատիվ խումբը՝ բաժնի պետ Արման Պապյանի և ոստիկանության Երևան քաղաքի վարչության քրեական հետախուզության բաժնի օպերատիվ խումբը՝ բաժնի պետ Բունիաթյանի գլխավորությամբ:
Ժամանել են նաև Հայաստանի քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնի խումբը՝ քննիչ Հովհաննիսյանի գլխավորությամբ:
Ոստիկաններն ու քննիչները Ford Transit մակնիշի ավտոմեքենայի միջնամասում հայտնաբերել են Երևանի բնակիչ, 36-ամյա Արթուր Հարությունյանի դին:
Ըստ տեղեկությունների՝ վերջինս մի քանի օր որպես անհայտ կորած որոնվում էր ոստկանության կենտրոնական բաժնի կողմից:
Փաստի առթիվ նյութեր են նախապատրաստվում:
