ԵՐԵՎԱՆ, 14 հոկտեմբերի — Sputnik. Ոստիկանության Երևան քաղաքի վարչության քրեական հետախուզության բաժնի ծառայողները օպերատիվ տեղեկություններ են ստացել, որ գիշերը՝ ժամը 02:00-ի սահմաններում, Հյուսիսային պողոտայում գործող «Հուկման» ակումբում կրակոցներ են հնչել:
Այս մասին տեղեկացնում են Ոստիկանության հասարակայնության հետ կապերի և լրատվության վարչությունից:
Ըստ այդմ՝ Գեղարքունիքի մարզի Նորատուս գյուղի բնակիչ Արա Բանդուրյանը, կոպիտ կերպով խախտելով հասարակական կարգը, ակումբի աշխատակիցների և հաճախորդների ներկայությամբ իր մոտ եղած դեռևս չպարզված ատրճանակով մի քանի անգամ կրակոցներ է արձակել:
Ոստիկանության ծառայողների իրականացրած բացատրական աշխատանքի շնորհիվ Արա Բանդուրյանը ներկայացել է ոստիկանության Կենտրոնական բաժին։
Հարուցվել է քրեական գործ ՀՀ քրեական օրենսգրքի 258-րդ հոդվածի 4-րդ մասի՝ խուլիգանության հատկանիշներով։
Արա Բանդուրյանը ձերբակալված է։
Քրեական գործն ուղարկվել է նախաքննական մարմին՝ հետագա քննության համար։
