ԵՐԵՎԱՆ, 14 հոկտեմբերի — Sputnik. ԱՄՆ-ում պետք է, վերջապես, հասկացած լինեին, որ Նահանգների քաղաքացիները անձեռնմխելի չեն:
TRT-ի փոխանցմամբ՝ այս մասին հայտնել է Թուրքիայի արտգործնախարար Մևլութ Չավուշօղլուն՝ Լոնդոնում, որտեղ նա պետք է հանդիպի Մեծ Բրիտանիայի արտգործնախարար Ջերեմի Հանթի հետ։
«Հուսով եմ՝ Ամերիկայի Միացյալ Նահանգները հասկացավ, որ իր քաղաքացիները անձեռնմխելի չեն», — ասել է Թուրքիայի արտգործնախարարը՝ մեկնաբանելով ամերիկացի հոգևորական Էնդրյու Բրանսոնի դատավարությունը։
Լոնդոնում լրագրողներին արած իր հայտարարության մեջ Չավուշօղլուն անդրադարձավ հոգևորականի դատավարությանը․ «Մենք ասում էինք, որ խնդիրը կլուծի դատարանը, այլ ոչ թե պատժամիջոցներն ու սպառնալիքները։ ԱՄՆ քաղաքացիներն անձռնմխելի չեն։ Հուսով եմ՝ ԱՄՆ-ում հասկացան, որ ճնշում գործադրելով հնարավոր չէ Թուրքիայից արդյունք ստանալ։ Բոլորը պետք է ենթարկվեն դատական համակարգի որոշումներին»։
Մևլութ Չավուշօղլուի ու Ջերեմի Հանթի երկկողմանի հանդիպումը նախատեսված է հոկտեմբերի 15-ին։
Ակնկալվում է, որ բանակցությունների ընթացքում քննարկվելու են քաղաքական ու տնտեսական հարաբերությունները, ռազմական համագործակցությունն ու իրավիճակը Սիրիայում։ Նաև մտքեր են փոխանակվելու Թուրքիա-ԵՄ հարաբերությունների ու Մեծ Բրիտանիայի ԵՄ-ից (Вrexit) դուրս գալու գործընթացի վերաբերյալ։
