ԵՐԵՎԱՆ, 9 հոկտեմբերի — Sputnik. Մոնակոյի իշխանությունը` Ֆրանկոֆոնիայի ակտիվ անդամը, պատրաստվում է ընդլայնել իր մասնակցությունն այդ կազմակերպությունում։ Այդ մասին Երևանում լրագրողներին հայտարարեց Մոնակոյի միջազգային հարաբերությունների և համագործակցության նախարար Ժիլ Թոնելին Ֆրանկոֆոնիայի միջազգային կազմակերպության (OIF) նախարարական համաժողովի ընթացքում, որն այսօր ավարտվում է Երևանում։
«Այսօր մենք OIF ղեկավարության համաձայնագիր ենք ստորագրել մեր աջակցությունն ավելացնելու մասին», – ասաց նախարարը։
Նրա խոսքով` Մոնակոն համագործակցության հեռանկարներ ունի Հայաստանի հետ։ Բնականաբար, առաջին հերթին կարելի է նշել զբոսաշրջությունը ։ Իսկ զբոսաշրջության հետ սերտորեն կապված է շրջակա միջավայրի պահպանման հարցը, որին իշխանությունում սևեռուն ուշադրություն են դարձնում։
Մոնակոյում կա՞ արդյոք հայ համայնք։ Բնականաբար, այո. չէ որ այնտեղ ապրում են 140 ազգություններ։
«Ես ստուգել եմ հենց գալուց առաջ։ Պարզվում է, որ մեզ մոտ ապրում է վեց հայ։ Ինչպես ձեզ հայտնի է, մեր պետությունը փոքր է։ Երկու քառակուսի կիլոմետրի վրա ապրում են 140 ազգությունների մարդիկ։ Բայց, ինչպես տեսնում եք, հայ համայնք նույնպես ունենք», – հավելեց Թոնելին։
Ֆրանսիայի նախագահի, Կանադայի և Բելգիայի վարչապետների, շատ երկրների ղեկավարների հետ միասին Հայաստան կժամանի նաև Մոնակոյի իշխան Ալբեր 2–րդը։
Նախարարական համաժողովից հետո Մոնակոն կմասնակցի նաև OIF գագաթաժողովին, որը տեղի կունենա Երևանում հոկտեմբերի 11-12–ին։
