ԵՐԵՎԱՆ, 8 հոկտեմբերի — Sputnik, Արամ Գարեգինյան. Երևանում անցկացվող Ֆրանկոֆոնիայի ֆորումը լավ հնարավորություններ է տալիս Կորեային ու Հայաստանին։ Այս մասին ֆորումի ընթացքում ասաց Ֆրանկոֆոնիայի միջազգային կազմակերպության (OIF) Կորեայի Հանրապետության ներկայացուցիչ Ժան Կեուն Խոն։
«Դա Ֆրանկոֆոնիայի ընտանիքի անդամ երկրների հետ հարաբերությունները լավացնելու հիանալի հնարավորություն է։ Կարծում եմ` OIF նախարարների համաժողովն ու գագաթնաժողովը բարձր մակարդակով մեր ներկայությունը միջազգային ասպարեզում ուժեղացնելու լավ հնարավորություն է», – ավելացրեց նա։
Կորեան OIF–ում դիտորդի կարգավիճակում է։ Կորեայում Ֆրանկոֆոնիայի մշակույթի զարգացման համար առաջին քայլերն են արվում, սակայն որոշ բաներ արդեն արվել են։
«Արևելյան Ասիայում Կոերան ֆրանսերեն իմացող ու ուսումնասիրող մարդկանց քանակով առաջինն է։ Մենք մեր տարածաշրջանում Ֆրանկոֆոնիայի միակ դիտորդ երկիրն ենք։ Մենք ընդլայնում ենք ֆրանսերենի ուսումնասիրությունը Կորեայում ու անցկացնում ենք միջոցառումներ, որոնք օգնում են երիտասարդներին ավելի լավ ծանոթանալ Ֆրանսիական մշակույթին», – ավելացրեց կորեացի դիվանագետը։
Մասնակցությունը OIF–ին նախագծերում այդ գիտելիքների մակարդակի բարձրացման, մշակութային փոխանակությունը աշխուժացնելու, նաև Ֆրանկոֆոնիայի արժեքներում մեր ներդրումն ունենալու լավ հնարավորություն է։ Դա, առաջին հերթին, մարդասիրությունն է ու կարիքավորների աջակցությունը։
«Այդ պատճառով մենք կարևորում ենք Աֆրիկային աջակցող OIF նախագծերը», – նշեց Ժան Կեուն Խոն։
Կորեացի դիվանագետների համար սա առաջին հայաստանյան այցն է, իսկ նրանց արաբ գործընկերներն այստեղ վաղուց ու բարեհաջող աշխատում են։
«Ես արդեն եղել եմ այստեղ 2015 թվականին, կրկին Ֆրանկոֆոնիայի նախարարական համաժողովին», – ասում է Զակի Անվար Նուսեյբեն, Միացյալ Արաբական Էմիրությունների պետական նախարարը։
OIF–ում Էմիրությունները մասնակցում են 2010 թվականից ու նույնպես դիտորդի կարգավիճակում են։
«Մենք շատ տպավորված ենք Հայաստանի, որպես ընդունող երկրի, կազմակերպչական աշխատանքի մակարդակով։ Ու ոչ միայն պաշտոնական մասով, այլ հայերի հյուրընկալությամբ, նրանց ընկերասիրությամբ», –նշեց նախարարը։
Գնալով` Էմիրությունների ավելի շատ բնակիչներ բացահայտում են իրենց համար Հայաստանի այդ որակները, ևս մեկ անգամ ընդգծեց պաշտոնյան։ Այստեղ նա արևելյան ավանդույթներով շռայլ էր գովասանքի բառերի հարցում։
«Մենք կրկին տեսանք ու ավելի լավ ճանաչեցինք Հայաստանն ու Երևանը` աշխարհի ամենահին քաղաքներից մեկը։ Այստեղ կա մշակույթի հարստություն, բնության գեղեցկություն, հյուրընկալություն։ Հյուրերը ԱՄԷ–ից սկսեցին բացահայտել ձեր երկիրը ոչ միայն որպես հանգստյան վայր, այլև որպես զբոսաշրջության, գյուղատնտեսության ոլորտում ներդրումների երկիր», – ավելացրեց Նուսեյբեն։
Նա ավելացրեց, որ շատ կարևոր է և՛ Ֆրանկոֆոնիայի, և՛ արաբերենի զարգացումը Հայաստանում։ Հայաստանը միշտ խոր մշակութային կապեր է ունեցել արաբական աշխարհի հետ, այդ թվում` Սիրիայի, Լիբանանի, Հորդանանի հետ։ Նախարար Նուսեյբեն վստահ է, որ դժվար է պատկերացնել այդ ու բազում այլ երկրների կյանքն առանց հայ համայնքի։
Նա հիշեց նաև իր հայրենի քաղաքը` Երուսաղեմը, ու կարևորեց արևելյան քրիստոնեական, այդ թվում՝ հայկական եկեղեցին։
«Կարծում եմ` դա կօգնի Հայաստանում արաբական մշակույթի ու լեզվի տարածմանը», – ավելացրեց նա։
Հիշեցնենք՝ հոկտեմբերի 11-12 –ին Երևանում կայանալիք Ֆրանկոֆոնիայի գագաթնաժողովին ժամանելու են Ֆրանսիայի նախագահ Էմանուել Մակրոնը, Կանադայի ու Բելգիայի վարչապետներ Ջասթին Տրյուդոն ու Շարլ Միշելը, նաև բարձր մակարդակի պատվիրակություններ աշխարհի տասնյակ երկրներից:
