ԵՐԵՎԱՆ, 6 հոկտեմբերի — Sputnik. Երգչուհի Անի Լորակը ամուսնալուծության գործընթաց է սկսել թուրք ամուսնու` Մուրատ Նալչաջիօղլու հետ։ Այս մասին հայտնում է «ԻՆՖՈՏԱԲ» պարբերականը` հղում անելով իր աղբյուրին։
Նոտարները Լորակից նամակներ են ստացել, որոնք հաստատում են այն փաստը, որ զույգն ամուսնալուծության գործընթացի մեջ է։
«Կիևում գտնվող նոտարական գրասենյակն Անի Լորակի անունից նամակ է ստացել, որտեղ նա նշել է կիևյան գույքի ցանկը և նոտարներին ծանուցել որևէ գործողություն չիրականացնել այդ գույքի հետ, քանի որ ամուսնալուծության գործընթաց է սկսել», —հայտնում է պարբերականը։
Փաստորեն երգչուհին խոստովանել է, որ ամուսնալուծվում է Մուրատի հետ, սակայն այս տեղեկությունը Լորակը պաշտոնապես չի հաստատել։ Երգչուհին շարունակում է լռել` չպատասխանելով նույնիսկ այն երկրպագուներին, որոնք Instagram-ում հուզիչ գրառումներ են անում`աջակցելով սիրելի երգչուհուն։
Հիշեցնենք, որ Անի Լորակն ու թուրք գործարար Մուրատ Նալչաջիօղլուն ամուսնացել էին 2009 թվականին, 4 տարի հանդիպելուց հետո։ Շքեղ հարսանիքը տեղի էր ունեցել Անթալիայի ափին գտնվող «Ադամ և Եվա» թանկարժեք հյուրանոցներից մեկում։ 2011 թվականին Անին լույս աշխարհ էր բերել դստերը` Սոֆյային։
Նրանց ընտանիքում խնդիրներ էին առաջացել այն բանից հետո, երբ ամուսնուն մեկ այլ կնոջ հետ էին տեսել կարաոկե ակումբում։ Համացանցում էր հայտնվել մի տեսանյութ, որում Լորակի ամուսինը գրկել էր մի կնոջ ու ինչ-որ բան էր շշնջում նրա ականջին։
