ԵՐԵՎԱՆ, 5 հոկտեմբերի — Sputnik. Ազգային ժողովում այսօր բացի «Ելքից» չկա քաղաքական այլ ուժ, որը համամիտ է, որ խորհրդարանը գնա ինքնալուծարման: Այս մասին Ազգային ժողովում լրագրողներին հետ զրույցում ասաց ԱԺ փոխնախագահ Էդուարդ Շարմազանովը։
«Իսկ, եթե Փաշինյանը գնում է հրաժարականի, ինչի իրավունքն ինքն ունի ըստ Սահմանադրության, դրանից հետո արդեն կքննարկենք, կտեսնենք: Լինում են ուզելով` կոնսենսուսով, ԱԺ ընտրություններ և լինում են պարտադրված ընտրություններ: Եթե Նիկոլ Փաշինյանը հրաժարական է տալիս, դա պարտադրված ընտրություն է», — ասաց Շարմազանովը:
Թե ինչպես կվարվի ՀՀԿ-ն վարչապետի հրաժարականի դեպքում, Շարմազանովը վաղաժամ է համարում հայտարարել:
«Ես ասել եմ` այն, ինչ առաջարկում է վարչապետը` լավագույն տարբերակը չէ, եթե չասեմ` վատագույնն է: Բայց երբմն դու ընտրում ես վատի ու վատթարագույնի միջև: Հիմա գնդակն իր դաշտում է, ինքը Սահմանադրությամբ իրավունք ունի հրաժարական տալ կամ չտալ: Եթե ինքը հրաժարական տա, քաղաքական ուժերն այն ժամանակ կքննարկեն` ըստ իրավիճակի, երկրի շահերից ելնելով առաջադրում են, թե չեն առաջադրում»,- ասաց Շարմազանովը:
ԱԺ փոխնախագահը Նիկոլ Փաշինյանի քայլերը իրար հակասող որակեց` հիշեցնելով, որ վարչապետ ընտրվելուց հետո Փաշինյանը հայտարարել էր, որ արտահերթ ընտրություններ կլինեն 1 տարի հետո` կուսակցությունների մասին օրենքի ու ընտրական օրենսգրքի փոփոխությունից հետո, մինչդեռ այսօր, դեռ ոչ մի բան չարված հայտարարում է դեկտեմբերի արտահերթ ընտրություններ անցկացնելու անհրաժեշտության մասին:
Անդրադառնալով հոկտեմբերի 2-ին անցկացված ԱԺ արտահերթ նիստին, որի ժամանակ խորհրդարան ընդունել էր ԱԺ Կանոնակարգ օրենքում ՀՀԿ խմբակցության պատգամավորների առաջարկած փոփոխությունները, որոնք, ըստ վերլուծությունների, վարչապետի ընտրության ժամանակ թույլ կտան արհեստականորեն հավերժ ձգձգել նիստի կայացումը, հետևաբար և վարչապետի չընտրվելու և ԱԺ լուծարման հարցը, ԱԺ փոխնախագահը հայտարարեց, որ այդ օրը գործադրի ղեկավարը Սահմանադրություն է խախտել:
«Սահմանադրության մեջ գրված է` պատգամավորը կաշկանդված չէ հրամայական մանդատով, և քվեարկում է իր խղճին, համոզմունքներին համապատասխան: Գրված է` պաշտպանվում է իշխանությունների տարանջատման սկզբունքը: Որտե՞ղ է գրված, որ կառավարության ղեկավարն իրավունք ունի իր կողմնակիցներին բերել և ճնշում գործադրել պատգամավորների վրա»,- ասաց Շարմազանովը` հիշեցնելով, որ մինչ արտահերթ նիստը սկսելը Փաշինյանն արդեն ֆեյսբուքի ուղիղ եթերով իր կողմնակիցներին կոչ էր արել հավաքվել ԱԺ-ի մոտ:
Այդ իրավիճակը ԱԺ փոխնախագահը համարժեք է համարում ձեռքեր-ոտքերը կապելուն ու ցուցմունք կորզելուն:
