ԵՐԵՎԱՆ, 5 հոկտեմբերի — Sputnik. ԱԺ–ը երկրորդ ընթերցմամբ ու ամբողջությամբ ընդունեց «ՀՀ տոների և հիշատակի օրերի մասին» օրենքում փոփոխություններ անելու մասին կառավարության ներկայացրած նախագիծը:
Այս փոփոխությունը կառավարությանն իրավունք կտա աշխատանքային օրերի տեղափոխման վերաբերյալ որոշում կայացնել «բացառիկ նշանակության իրադարձությունների կապակցությամբ», քանի որ մինչ այժմ կառավարությունը կարող էր աշխատանքային օրերը տեղափոխելու որոշում կայացնել բացառապես տոների ու հիշատակի օրերի դեպքում։
Օրենքի փոփոխության բուն նպատակն այն է, որ գործադիրն իրավունք ստանա ոչ աշխատանքային սահմանել Ֆրանկոֆոնիայի գագաթնաժողովի առավել հագեցած 2 օրերը` հոկտեմբերի 11-12-ը:
Այս մասին որոշումը գործադիրը պետք է ընդունի առաջիկա շաբաթվա առաջին 3 օրերի ընթացքում։ Իսկ մինչ այդ ԱԺ–ի ընդունած օրինագիծը պետք է վավերացվի ՀՀ նախագահի կողմից։
