ԵՐԵՎԱՆ, 3 հոկտեմբերի — Sputnik. Երկրորդ մայիսի 1 անելու գայթակղությանը տրվելու կարիք չկա։ Այսօր ԱԺ-ում, պատասխանելով լրագրողների հարցերին, ասաց ՀՀ վարչապետ Նիկոլ Փաշինյանը։
«2018թ-ի մայիսի 1-ին ես այս ամբիոնից էլ ազդարարեցի քաղաքական որոշ ուժերի` ինքնասպանություն գործելու փաստի մասին, և կարող եմ ասել, որ ցավալիորեն ինքնասպանությունների շարքը շարունակվում է»,- ասաց Փաշինյանը` անդրադառնալով երեկ ԱԺ 3 քաղաքական ուժերի հետ ունեցած իր հանդիպումների վերաբերյալ վերջինների արած մեկնաբանություններին։
Փաշինյանը հայտնեց, որ հոկտեմբերի 2-ին ինքը ԱԺ նախագահի աշխատասենյակում հանդիպել է «Ելք», «Ծառուկյան», ՀՅԴ խմբակցությունների պատգամավորների հետ։ Այդ հանդիպմանը ԱԺ նախագահը ներկա չի եղել, նրա հետ հանդիպել է առանձին։
«Ես ասել եմ, որ դեկտեմբերին Հայաստանում պետք է տեղի ունենան խորհրդարանական արտահերթ ընտրություններ, ասել եմ մեխանիզմի մասին։ Խմբակցությունների ներկայացուցիչներն ասել են, որ վարչապետի պաշտոնը թափուր մնալու դեպքում իրենք չեն պատրաստվում վարչապետի թեկնածու առաջադրել։ Եվ կարծում եմ, որ մեր գործընկերները հստակ արձանագրել են այն իրավիճակը, որ կա երկրում»,- ասաց վարչապետը։
