ԵՐԵՎԱՆ, 2 հոկտեմբերի — Sputnik. Հայաստանի իշխանությունների համար թիվ մեկ օրակարգային խնդիրը պիտի լինի ոչ թե արտահերթ խորհրդարանական ընտրությունների անցկացումը, այլ անվտանգության ապահովումը։ Այսօր ԱԺ հայտարարությունների ժամին ասաց ԱԺ փոխնախագահ, ՀՀԿ խոսնակ Էդուարդ Շարմազանովը` հավելելով, որ ԱԺ-ի ինքնալուծարման իրավական որևէ հիմք չկա։
Շարմազանովը հիշեցրեց` երեկ վարչապետ Նիկոլ Փաշինյանը հայտարարեց 2-3 ամսում հրատապ ընտրություններ անցկացնելու մասին։ Մինչդեռ, երեք ամիս առաջ, ըստ ԱԺ փոխխոսնակի, Փաշինյանը նշում էր, որ ընտրությունները պետք է կայանան կա՛մ մայիսի վերջին, կա՛մ հունիսին։
«Նույն ինքը` Փաշինյանը նշեց, որ մինչ արտահերթ ընտրությունները, պետք է ընդունվի նոր ընտրական օրենսգիրք և փոփոխություններ կատարվեն կուսակցությունների մասին օրենքում, և այդ ամենին պետք է հասնել քաղաքական ուժերի լիակատար կոնսենսուսի պայմաններում։ Ո՞ւր է ընդունված ընտրական օրենսգիրքը, ո՞ւր են փոփոխությունները կուսակցությունների մասին օրենսգրքում և ո՞ւր է կոնսենսուսն այս դահլիճում։ Չկան»,– ասաց Շարմազանովը` հայտարարելով, որ արտահերթ ընտրությունների անցկացումն այս պայմաններում կասկածի տակ կդնի Հայաստանում քաղաքական բազմակարծության գոյությունը, իշխանությունների տարանջատումը և ճանապարհ կհարթի մեկ անձի լիակատար մենաշնորհի համար։
Շարմազանովն իր ելույթում վերլուծեց նաև Փաշինյանի 5 ամիս առաջ տված խոստումներն ու ներկա իրավիճակը։
«Խոստացվել է թռիչքային զարգացում, թռիչքային զարգացման որևէ միտում առկա չէ։ Խոստացվել են ներդրումներ, որևէ ներդրումային ծրագիր առկա չէ։ Խոստացվել են աշխատատեղեր, որևէ աշխատատեղ բացված չէ։ Խոստացվել է, որ այլևս չեն կրակի, պայմանավորվածությունից հետո երկու օր կրակում են Ադրբեջանից»,– ասաց նա։
Ելույթն ավարտելով` Էդուարդ Շարմազանովը նշեց, այս ամենի մեղավորն ու պատասխանատուն ԱԺ–ը չէ, այլ ՀՀ կառավարությունը։
