ԵՐԵՎԱՆ, 2 հոկտեմբերի — Sputnik. «Հանրապետական» խմբակցության ղեկավար Վահրամ Բաղդասարյանը չի գնացել Նիկոլ Փաշինյանի հետ հանդիպմանը, որպեսզի լրացուցիչ էմոցիաներ ու ժպիտ պարգևի նրան: Այսօր ԱԺ-ում լրագրողների հետ զրույցում, անդրադառնալով Բաղդասարյանի և Փաշինյանի երեկվա հանդիպմանը,ասաց ՀՀԿ փոխնախագահ, ԱԺ ՀՀԿ խմբակցության պատգամավոր Արմեն Աշոտյանը:
«Նույնը երևի Նիկոլ Փաշինյանն է արել, չի եկել այդ հանդիպմանը, որպեսզի Վահրամ Բաղդասարյանը մի գավաթ սուրճից հետո բարձր տրամադրությամբ հեռանա»,- ասաց նա` հավելելով, որ սա աշխատանքային քննարկում է, ռեալիթի շոու չէ, և նպատակն էլ ոչ թե պրոցեսն է, այլ արդյունքը:
«Ես մի քիչ զարմացա, որ վարչապետը մեկնաբանություն տալիս ՀՀԿ-ին վերագրեց մինչև 2020 թվականը ընտրություններ չանցկացնելու որոշումը: Նման որոշում խմբակցությունը չունի, առանձին պատգամավորներ՝ ես, Էդուարդ Շարմազանովը, Գագիկ Մելիքյանը, տարբեր կարծիքներ ենք հայտնում, բայց երեկվա քննարկման արդյունքում նման որոշում մեզ վերագրել չի կարելի»,- ասաց նա:
Աշոտյանը նշեց, որ պետք չէ թերագնահատել նաև մյուս ուժերին՝ «Ծառուկյան» դաշինքին ու ՀՅԴ-ին, ուստի գործընթացի հաջողությունը պայմանավորված չէ միայն Նիկոլ Փաշինյան-Վահրամ Բաղդասարյան բանակցությունների արդյունավետությամբ:
«Կարծում եմ՝ ներվը պետք է հանել այդ բանակցություններից, վարչապետը մի քիչ նյարդային էր վերջին հարցազրույցի ընթացքում: Պետք է քիչ արտահոսքեր տալ, թե ինչ են խոսել»- հակառակ կողմին խորհուրդ տվեց Աշոտյանը:
Իսկ թե ինչու է վարչապետը ցանկանում գնալ շուտափույթ արտահերթ խորհրդարանական ընտրությունների, ըստ Աշոտյանի` պատճառն այն է, որ Փաշինյանը վախենում է սպառել իր աշխատելու սահմանադրական իմունիտետը:
Հիշեցնենք` ՀՀ վարչապետ Նիկոլ Փաշինյանն ավելի վաղ հայտնել էր, որ պետք է արագացնել ԱԺ արտահերթ ընտրությունների անցկացումը։
ՀՀԿ փոխնախագահ, ԱԺ պատգամավոր Գալուստ Սահակյանն էլ սեպտեմբերի 27-ին կուսակցության գործադիր մարմնի նիստից հետո լրագրողներին ասել էր, որ ՀՀԿ-ն պատրաստ է մասնակցել արտահերթ խորհրդարանական ընտրություններին, եթե դրանք կայանան։
Երեկ` հոկտեմբերի 1-ին, Փաշինյանըհանդիպել էր Ազգային ժողովի «Հանրապետական» խմբակցության ղեկավար Վահրամ Բաղդասարյանի հետ, որը հանդիպումից ասել էր` կարողացել են ձեռք բերել նորմալ պայմանավորվածություններ:
