Համացանցում նոր կադրեր են հայտնվել Դուշանբեում Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումից։ Նույն վերելակից դուրս եկող առաջնորդների զրույցը հայտնվել է «Ռոսիա» հեռուստաընկերության օբյեկտիվում։
«Կարելի՞ է պատկերացնել արդյոք այլ հարթակ, որտեղ այսպիսի բան հնարավոր կլիներ։ Իսկ սա տեղի է ունեցել Դուշանբեում, ԱՊՀ գագաթաժողովում։ Հայտնի չէ, թե ինչ է եղել հարևան խցիկում, բայց այս կադրերը կարող են սենսացիոն համարվել», — ասում է ռեպորտաժի հեղինակը։
Տեսանյութում երևում է, որ Փաշինյանը և Ալիևն աշխուժորեն ինչ-որ բան են քննարկում։ Ի դեպ, Հայաստանի վարչապետն արդեն հաղորդել է` ինչի մասին են նրանք խոսել։
Այնուհետև թղթակցի ուշադրության կենտրոնում են հայտնվել Փաշինյանը և Ռուսաստանի նախագահ Վլադիմիր Պուտինը։ Կարճատև խոսակցությունից հետո նրանք բաժանվում են, որից հետո նախագահը ինչ-որ բան է հիշում և կանչում Հայաստանի վարչապետին. «Նիկո՛լ Վլադիմիրովիչ»։
«Հայաստանի նոր ղեկավարի նկատմամբ մեծ է նաև լրագրողների ուշադրությունը. ուր կտանի նա երկիրը», — ասում է լրագրողը և մոտենում Փաշինյանին։
Հարցին, թե ինչպիսի տրամադրություն ունի, Փաշինյանը պատասխանում է, որ տրամադրությունը դրական է, աշխատանքային։
Հիշեցնենք` Դուշանբեում ԱՊՀ գագաթնաժողովից հետո Նիկոլ Փաշինյանը հայտարարեց, որ Ադրբեջանի նախագահ Իլհամ Ալիևի հետ զրույցի ընթացքում պայմանավորվածություն են ձեռք բերվել հրադադարի ռեժիմի խախտումները կանխելու, ինչպես նաև երկխոսությանն ու բանակցություններին հավատարիմ մնալու մասին։ Կողմերի երրորդ կարևոր պայմանավորվածությունը, ըստ պաշտոնական հայտարարությունների, նրանց միջև օպերատիվ կապի հաստատումն է եղել։
