ԵՐԵՎԱՆ, 1 հոկտեմբերի — Sputnik. Հայաստանում 100 և ավելի տարեկան 67 տարեց քաղաքացի կա։ Այս մասին այսօր լրագրողների հետ հանդիպմանը հայտնեց Աշխատանքի և սոցիալական հարցերի նախարարության Հաշմանդամների և տարեցների հիմնահարցերի վարչության պետի տեղակալ Անահիտ Գևորգյանը։
Հետաքրքրական է, որ երկարակեցությամբ աչքի են ընկնում հիմնականում կանայք։ ՀՀ ամենատարեց բնակչուհին Եղեգնաձորում ապրող 113 տարեկան տատիկ է, երկրորդը` 111 տարեկան է, երրորդը` 110։
Իսկ 90-100 տարեկան տարեցների թիվը 7 210-ն է։
Ինչ վերաբերում է տարեցների ապահովությանն ու խնամքին, Գևորգյանը հայտնեց, որ Հայաստանում այսօր գործում են խնամքի 12 հաստատություն, 5-ը` պետական, 7-ը`ոչ պետական: Դրանցում բնակվում են 1240 տարեց։
«Հաստատությունների մի մասում ապրում են հոգեկան առողջության խնդիրներ ունեցող անձինք»,- ասաց Գևորգյանը:
Պաշտոնյային ոգևորում է այն, որ խնամքի տների ու դրանց բնակիչների թիվը Հայաստանում վերջին տարիներին գրեթե անփոփոխ է, ինչը նշանակում է, որ պահանջարկը մեծ չէ։
«90-ական թվականներին մենք մինչև 200 մարդ ունեինք հերթում, որպեսզի ընդունվեն խնամքի հաստատություններ»,- ասաց Գևորգյանը` ավելացնելով, որ այսօր հերթ չկա։
Փոխարենը Հայաստանում ավելացել է հոգեկան առողջության խնդիրներ ունեցող տարեցների ու նման հաստատություններ ընդունվելու համար հերթագրվածների թիվը։
Այսօր Հայաստանում ու աշխարհում նշվում է տարեցների միջազգային օրը, որը հռչակվել է 1990 թվականի դեկտեմբերի 14-ին ՄԱԿ-ի Գլխավոր ասամբլեայի որոշմամբ:
