ԵՐԵՎԱՆ, 28 սեպտեմբերի — Sputnik. Հայաստանցի սպառողները թանկացած տավարի մսի փոխարեն վերջին շրջանում սկսել են ավելի շատ թռչնամիս սպառել, իսկ հավի մսի մեջ հակաբիոտիկների քանակն ամենաբարձրն է։ Ստացվում է` հայաստանցիների օրգանիզմում հակաբիոտիկների քանակն ավելանում է։ Այս եզրակացությանն են հանգել ՀՀ ԳԱԱ Էկոկենտրոնի սննդի ռիսկերի կենտրոնի մասնագետները։ Կենտրոնի ղեկավար Դավիթ Պիպոյանը Sputnik Արմենիային ասաց, որ օրական 300 գրամ թռչնամիս օգտագործող սպառողներն այս իմաստով արդեն թիրախային խմբում են։
Նրա խոսքով` անհրաժեշտ ուսումնասիրություններ պետական մակարդակով չեն արվում նաև ֆինանսական հնարավորությունների բացակայության պատճառով։ Իսկ բնակչությունն այս ոլորտում ցածր մակարդակի գիտելիքներ ունի և բազմազանություն չի մտցնում իր կերակրացանկում։
«Օրինակ` ձուկը, չնայած ոչ այնքան թանկ գնին, մեզ մոտ դեռ բանկետային ուտելիք է: Երևանում ամեն մի բնակիչ օգտագործում է օրական 17 գրամ ձուկ»,- ասաց Պիպոյանը:
Նշենք, որ Հայաստանում այսօր տավարի միսը վաճառվում է 1 կգ-ը` 4000-5000 դրամով, հավի թարմ, տեղական միսն արժե 2000, սառեցվածը` 1300-1500 դրամ, իշխան ձկան 1 կգ-ի արժեքն էլ տատանվում է 2500-5000 դրամի սահմանում։
Հակաբիոտիկների մեծ քանակի օգտագործումը, մասնագետների գնահատմամբ, կարող է հանգեցնել շաքարային դիաբետի առաջացման։ Իսկ այն մարդկանց համար, որոնց օրգանիզմը հակաբիոտիկ չի յուրացնում, դրա մեծ քանակով ընդունումը կարող է նաև մահացու վտանգավոր լինել։
