Բաբայանի խոսքով` արցախա-ադրբեջանական սահմանին տիրող իրավիճակն ընդհանուր առմամբ վերահսկելի է, կարելի է ասել` կայուն։
«Ճիշտ է` Ադրբեջանում վերջերս անցկացված զորավարժություններից հետո ադրբեջանական բանակի ոչ բոլոր ստորաբաժանումներն են հետ քաշվել իրենց մշտական տեղակայման վայրեր, բայց իրավիճակն ընդհանուր առմամբ կայուն է, և Արցախի Հանրապետության ՊԲ-ն շարունակում է իր ձեռքերում ամուր պահել ռազմավարական նախաձեռնողականությունը»,- ասաց նա։
Ըստ Բաբայանի` նորմալ տրամաբանությամբ հնարավոր է չէ բացատրել Ադրբեջանի այդ քայլը, քանի որ ահաբեկչական երկրներն առողջ տրամաբանություն չունեն։
«Սա ոչ առաջին անգամն է, ոչ էլ վերջին, որ Ադրբեջանն այդպես է վարվելու, բայց հետաքրքիր է, որ նման պահվածքն արդեն իսկ արժանանում է ԵԱՀԿ ՄԽ եռանախագահների գնահատականին»,- ասաց Արցախի նախագահի մամուլի քարտուղարը` հիշեցնելով ԵԱՀԿ-ի տարածած վերջին հայտարարությունը, որում կողմերին կոչ էր արվում զերծ մնալ ապակայունացումից։ Բաբայանը վստահեցնում է, որ այդ հորդորի հիմնական հասցեատերն Ադրբեջանն է։
Արցախի Հանրապետության նախագահի մամուլի քարտուղարը ճիշտ չի համարում այսօրվա իրադրությունը համեմատել 2016 թվականի հետ։
«Ադրբեջանն ավելի քան 20 տարի պատրաստվել էր 2016 թվականին և մտածել էր, որ մենք պատրաստ չենք, հասարակությունը համախմբված չէ, և փորձեց սրընթաց պատերազմի միջոցով հարցը կարգավորել։ Բայց քանի որ ստացավ համապատասխան հակահարված, և ձախողվեց նրա նենգ ծրագրերը, հիմա նորից նման պատերազմ սկսելը հեռանակարային չէ, նա ի վիճակի չէ դա անել»,- ասաց Բաբայանը։
