ԵՐԵՎԱՆ, 28 սեպտեմբերի — Sputnik. Հայաստանը Անդորրայի համար նոր նվեր է պատրաստել։ Այն կրկին ճոխ չի լինի, սակայն իմաստ կունենա։
Վերջերս Անդորրա լա Վելյա բերեցին Հայաստանում պատրաստած խաչքարը։ Առաջիկայում այնտեղ հայ–անդորրական բարեկամության ծառ կտնկեն։
Նվերներն ընդունելու համար Անդորրայի իշխանություններն հանդիսավոր արարողություն կանցկացնեն հոկտեմբերի կեսերին։
Ինչպես նշում է Անդորրայում Հայաստանի պատվո հյուպատոս Արա Բաղդասարյանը, հայկական ընծաների համար տերերը առանձին ծառուղում տեղ են հատկացրել։
Տեղի հայերին ծառը պետք է պատմական հայրենիքի մասին հիշեցնի։ Ու թեև Անդորրայի կլիման մի փոքր տարբերվում է կովկասյանից, սակայն Հայաստանը խորհրդանշող ծառը, այստեղ պետք է որ նորմալ աճի։
«Մի քանի տարի առաջ Անդորրայում Հայաստանի մասին ոչ ոք չգիտեր։ Իսկ այժմ մենք արդեն բարեկամական, նույնիսկ ազգակցական ժողովուրդ ենք։ Առանց չափազանցնելու։ Չէ՞ որ մի քանի տարի առաջ այստեղ ստեղծվել է առաջին հայ–անդորրական ընտանիքը։ Ընտանիքի հայրը` բնիկ անդորրացի է։ Մասնագիտությամբ` ճարտարապետ, վերջերս դարձել է Անդորրա լա Վելյա գլխավոր ճարտարապետը», – ասում է Բաղդասարյանը։
Սուրեն Սալան` Անդորրայում ծնված փոքրիկն է, որի երակներում հայկական արյուն է հոսում։ Երեխան մի քանի լեզուներով կսկսի խոսել։ Չէ՞ որ և՛ հայերը, և՛ կատալոնացիները լեռնային ժողովուրդ են, բայց ամենևին էլ ոչ ինքնամփոփ և սիրում են լեզուներ սովորել։ Երեխայի մայրը` Գայանեն, գիտի կատալոներեն (Անդորրայի պաշտոնական լեզու) և իսպաներեն։ Իսկ հայրը` Ջերարդ Սալան, արդեն հայերեն բառեր է սկսել սովորել։
Անդորրացիները նաև ֆրանսերեն են խոսում։ Երևանում հոկտեմբերի սկզբին անցկացվող Ֆրանկաֆոնիայի գագաթնաժողովին Անդորրայից բարձր մակարդակով պատվիրակություն կժամանի` վարչապետ Անտոնի Մարտին և ԱԳՆ ղեկավար Մարիա Ուբակ Ֆոնտը։
Երկու երկրների հարաբերությունները հետաքրքիր զարգացում են ապրում։ Այդ պատճառով էլ ծառը Անդորրա լա Վելյայի «հայկական ծառուղում» պետք է, որ համապատասխան լինի` թափվող տերևներով, սակայն ամուր ճյուղերով և արմատներով։
