ԵՐԵՎԱՆ, 27 սեպտեմբերի — Sputnik. Ռոբերտ Քոչարյանի նկատմամբ կալանքի որոշում կայացրած դատավորի` Վաչե Մարգարյանի նկատմամբ գնահատական պիտի տա նախաքննական մարմինը։ Այս մասին Sputnik Արմենիայի հետ զրույցում ասաց ՀՀ արդարադատության նախարար Արտակ Զեյնալյանը` ձեռնպահ մնալով դատավորի` պաշտոնյաներին զանգահարելու հարցը մեկնաբանելուց։
«Այդ ուղղությամբ իրականացվում է նախաքննություն, և փաստերին գնահատական պիտի տա հենց այդ մարմինը։ Արդարադատության նախարարն ու պետական պաշտոնյաները պետք է ձեռնպահ մնան նախապես դիրքորոշումներ հայտնելուց։ Դա կարող է տպավորություն ստեղծել, որ ազդեցություն է եղել իրավասու մարմնի որոշման վրա»,- ասաց Զեյնալյանը։
Իսկ ինչ վերաբերում է ԱԱԾ պետ Արթուր Վանեցյանի և ՀՔԾ նախագահ Սասուն Խաչատրյանի հեռախոսազրույցի գաղտնալսման սկանդալային դեպքին, որի ընթացքում հնչել էր նաև Վաչե Մարգարյանի անունը, Զեյնալյանը գաղտնալսման դեմ պայքարի իր բանաձևն առաջարկեց. «Գաղտնալսումների առաջարկը ոչնչացնելու նպատակով դրա պահանջարկի պտուղներից ես երբեք չեմ օգտվելու և ձեզ էլ խորհուրդ եմ տալիս չօգտվել դրանից»։
Հիշեցնենք` սեպտեմբերի 11-ին մամուլում հրապարակվեց ԱԱԾ պետ Արթուր Վանեցյանի և ՀՔԾ նախագահ Սասուն Խաչատրյանի 8-րոպեանոց հեռախոսազրույցը, որի ընթացքում վերջինները քննարկում են Հայաստանի նախկին նախագահ Ռոբերտ Քոչարյանի կալանքը, ինչպես նաև ՀԱՊԿ գլխավոր քարտուղար Յուրի Խաչատուրովի և ՊՆ նախկին ղեկավար Միքայել Հարությունյանի դեմ հարուցված քրեական գործերը։ Զրույցի ընթացքում ՀՔԾ պետը նաև հայտնում է, որ Ռոբերտ Քոչարյանի նկատմամբ խափանման միջոց ընտրելու դատական նիստից առաջ Երևան քաղաքի ընդհանուր իրավասության դատարանի դատավոր Վաչե Մարգարյանը զանգահարել է իրեն։
ՀՀ երկրորդ նախագահի նկատմամբ խափանման միջոցը որոշած` Երևան քաղաքի ընդհանուր իրավասության դատարանի դատավոր Վաչե Մարգարյանն արդեն իսկ հարցաքննվել է պաշտոնյաների գաղտնալսումների հարցով հարուցված քրեական գործի շրջանակում։
