ԵՐԵՎԱՆ, 26 սեպտեմբերի — Sputnik. ՀՀ արտգործնախարարությունը 254 դիվանագիտական անձնագիր է չեղարկել։ Այս մասին այսօր ԱԳՆ-ում տեղի ունեցած ճեպազրույցի ժամանակ ասաց ՀՀ ԱԳՆ մամուլի խոսնակ Տիգրան Բալայանը` պատասխանելով հարցին, թե արդյոք իրականությանը համապատասխանում է այն տեղեկությունը, որ չեղարկվել է Հայաստանի ֆուտբոլի ազգային հավաքականի ավագ Հենրիխ Մխիթարյանի դիվանագիտական անձնագիրը:
«Այս պահի դրությամբ չեղարկվել է 254 դիվանագիտական անձնագիր, որոնք մեր կոչերից ու հորդորներից հետո չեն վերադարձվել», — ասաց Բալայանը։
Նրա խոսքով` չի կարող ասել, թե կոնկրետ ովքեր են դիվանագիտական անձնագրեր ունեցել, քանի որ այդ տեղեկությունը պաշտպանված է անձնական տվյալների պաշտպանության մասին օրենքով։
Նա նաև նշեց, որ ավելի քան 100 անձնագրեր կամավոր վերադարձվել են։
Ավելի վաղ «Հրապարակ» թերթը գրել էր, որ Հայաստանի հավաքականի ավագ և «Արսենալի» կիսապաշտպան Հենրիխ Մխիթարյանին զրկել են դիվանագիտական անձնագրից։
