ԵՐԵՎԱՆ, 24 սեպտեմբերի — Sputnik. Հայաստանի կառավարությունը դիմել է ռուսական կողմին` ոչ կանոնավոր ուղևորափոխադրում իրականացնող վարորդներին թույլտվությունների նոր խմբաքանակ տրամադրելու հարցով։ Այս մասին իր ֆեյսբուքյան էջում հայտնել է ՀՀ Տրանսպորտի, կապի և տեղեկատվական տեխնոլոգիաների նախարարի տեղակալ Արմեն Փամբուխչյանը։
Նա նշել է, որ ոչ կանոնավոր ուղևորափոխադրում իրականացնող վարորդները հավաքվել էին տրանսպորտի, կապի և ՏՏ նախարարության մոտ՝ բողոքելով իրենց տրամադրված թույլտվությունների (дозволь) ժամկետի ավարտվելու դեմ։
«Դիմել ենք ռուսական կողմին ՝ նոր քանակություն տրամադրելու համար»,- իր գրառման մեջ հայտնում է փոխնախարարը։
Նա նշում է նաև, որ վարորդները նախարարությանը հայտնել են նաև իրենց հուզող այլ խնդիրի, մասնավորապես` մրցույթի անցկացման մասին։
«Այս առիթով վաղը նախարարությունում կձևավորվի աշխատանքային խումբ և հանդիպման ընթացքում կքննարկենք մանրամասները»,- գրել է փոխնախարարը:
Այս պայմանավորվածությունից հետո վարորդները դադարեցրել են նախարարության մոտ կազմակերպված բողոքի ակցիան:
Հիշեցնենք, 2018 թվականի հունիսի 1-ից ՀՀ-ից դեպի ՌԴ և հակառակ ուղղությամբ միջպետական ոչ կանոնավոր ուղևորափոխադրումներ իրականացնող ընկերությունները «Ավտոմոբիլային տրանսպորտի մասին» օրենքով պետք է դիմեն ՀՀ տրանսպորտի, կապի և տեղեկատվական տեխնոլոգիաների նախարարություն և թույլտվություն ստանան, այլապես նրանց չի թույլատրվի հատել սահմանային անցակետը:
