ԵՐԵՎԱՆ, 23 սեպտեմբերի — Sputnik. Երևանի ավագանու ընտրությունները ՀՀ նոր իշխանությունների քննությունն է։ Այսօր, լրագրողների հետ զրույցում ասաց «Երկիր ծիրանի» կուսակցության քաղաքապետի թեկնածու Զարուհի Փոստանջյանը։
«Իշխանությունը ստանձնողները պարտավորվել են անցկացնել ազատ, արդար, ժողովրդավարական ընտրություններ, ու հիմա մենք սպասում ենք, տեսնենք, թե ինչպես են հանձնելու այդ քննությունը։ Լծակներն իրենց ձեռքում են, այն լծակները, որի միջոցով պիտի կանխվեն ընտրակեղծիքներն ու ապօրինությունները»,– ասաց նա։
Զարուհի Փոստանջյանը հույս հայտնեց, որ Երևանի ավագանու ընտրություններին մասնակցող բոլոր քաղաքական ուժերը կստանան ընտրողների վստահության քվեն։
«Սա մի հոգու, մի քաղաքական ուժի գործ չէ։ Այս պահին մենք տեսնում ենք, որ նույնիսկ կառավարությունն իր գործառույթները չի կարողանում ի կատար ածել, որովհետև երկիրը, երբ քանդված է, բոլորը պիտի մասնակցեն դրա վերականգնմանը»,– ասաց Փոստանջյանը։
Իսկ թե ինչ է պատրաստվում անել ընտրվելու և չընտրվելու դեպքում, Զարուհի Փոստանջյանը չցանկացավ բացահայտել` ասելով` կտեսնենք։
Հիշեցնենք` Երևանի ավագանու արտահերթ ընտրությունները մեկնարկել են այսօր՝ սեպտեմբերի 23-ին, առավոտյան ժամը 08.00-ին, և կտևեն մինչև երեկոյան 20.00-ն: Երևանի ավագանու ընտրություններին մասնակցում է 12 քաղաքական կուսակցություն ու դաշինք:
