ԵՐԵՎԱՆ, 23 սեպտեմբերի — Sputnik.ՀՀ վարչապետ Նիկոլ Փաշինյանը մասնակցեց Երևանի ավագանու ընտրության քվեարկությանը։
Նա քվեարկության էր եկել դստեր` Մարիամի հետ։
Քաղաքացիական պարտքը կատարելուց հետո նա խոսեց քվեարկությանը նախորդած քարոզարշավի մասին` նլելով, որ այս քարոզարշավի ընթացքոմ բոլոր հասկանում էին՝ պետք է պայքարեին ամեն ձայնի համար։
«Մենք նույնպես հասկանում էիք դա։ Երբ ասում էին, կրքեր են բորբոքվում, ասեմ, որ սրանից հետո Հայաստանում ընտրությունների ժամանակ միշտ կրքեր են բորբոքվելու, որովհետև ընտրություններն իրական են լինելու։ Ընտրությունների արդյունքները դարակներում դրված չեն լինելու»,- ասաց նա` ավելացնելով, որ քարոզարշավի ընթացքից դժգոհելու պատճառ չունի։
Այնուհետև Փաշինյանը հիշեցրեց, որ շտապում է, որովհետև մեկնում է Նյու Յորք։
«Ինչ ակնկալիքներ ունեք այդ ուղևորությունից» հարցին ի պատասխան նա ասաց. «Իմ ակնկալիքները Հայաստանից են»։
«Բարգավաճ Հայաստանի» նկատմամբ հետապնդումներ չկա՞ն» հարցն էլ լսելուց հետո նա ժպտաց ու ռուսերեն պատասխանեց. «Такие вопросы задаете, что неудобно отвечать»։
Նշենք, որ լուրեր էին տարածվել, թե ԲՀԿ-ն քարոզարժավի ընթացքում ընտրակաշառքներ է բաժանել։ Երեկ ոստիկանությունը ստուգումներ է անցկացրել կուսակցության շտաբներից մեկում։
Փաշինյանը քվեարկեց Երևանի թիվ 133 մանկապարտեզում տեղակայված 8/16 ընտրատեղամասում, որտեղից շտապեց օդանավակայան։ Վարչապետը Նյու Յորքում կմասնակցի ՄԱԿ-ի Գլխավոր ասամբլեայի 73-րդ նստաշրջանի աշխատանքներին, որտեղ հանդես կգա ելույթով:
Այցի ընթացքում վարչապետ Փաշինյանը հանդիպում կունենա ՄԱԿ-ի գլխավոր քարտուղար Անտոնիո Գուտերեշի հետ: Նյու Յորքում նախատեսված են հանրապետության վարչապետի երկկողմ հանդիպումներ տարբեր երկրների գործընկերների հետ: Նիկոլ Փաշինյանը հանդիպում կունենա տեղի հայ համայնքի ներկայացուցիչների հետ, ինչպես նաև կայցելի Մետրոպոլիտեն թանգարանում բացվող «Արմենիա» խորագրով ցուցահանդես:
