ԵՐԵՎԱՆ, 23 սեպտեմբերի — Sputnik. Արարատ քաղաքում փողի շուրջ ծագած վիճաբանության ժամանակ երիտասարդներից մեկը դանակով հարվածել է մյուսին։ Այս մասին հայտնում է ոստիկանության մամուլի ծառայությունը։
Դեպքը տեղի է ունեցել սեպտեմբերի 21-ին։ Ժամը 21.25-ին ոստիկանության Արարատի բաժինն «Արարատ» բժշկական կենտրոնից հաղորդում է ստացել, որ «կրծքավանդակի ձախ կեսի առաջնային պատի կտրած-ծակած թափանցող վերք հեմոթորաքս ձախից» ախտորոշմամբ բուժօգնության է դիմել 26-ամյա մի քաղաքացի։
Հիվանդանոց մեկնած ոստիկաններին բժիշկը հայտնեց, որ ըստ տուժողի, ընկել է երկաթյա ամրաձողի վրա:
Ըստ բժշկի տեղեկանքի՝ տուժողն ի վիճակի չի եղել հաղորդում տալու:
Դեպքի առթիվ նյութերի նախապատրաստման ընթացքում ոստիկանները պարզել են, որ իրականում դանակահարություն է եղել։ Նախնական տվյալներով, սեպտեմբերի 21-ին, ժամը 21.00-ի սահմաններում, Արարատ քաղաքի Սպանդարյան փողոցի վերջնամասում, պարտքով տված փողի շուրջ ծագած վիճաբանության ժամանակ, տուժածին դանակով հարվածել է 20-ամյա Գևորգ Պ․-ն։
Գևորգ Պ․-ն ներկայացել է բաժին և տվել խոստովանական բացատրություն։
Ձեռնարկվում են միջոցառումներ հանցագործության գործիքը հայտնաբերելու ուղղությամբ:
