Արամյանը նշում է, որ երկրում որոշակի դրական ցուցանիշներ կան, բայց երկու կարևոր հանգամանք պետք է նշել։
«Առաջինը մենք պետք է հաշվի առնենք, որ տնտեսությունն օրգանիզմն է, այնտեղ ֆորմացիաները և ձևափոխումները շատ արագ չեն լինում։ Եվ որևէ կառավարության գործողությունը ունի լագային էֆեկտ։ Բացատրեմ ավելի պարզ։ Երբ օրգանիզմի միջամտություն ես անում, ասենք` հաբ ես տալիս, այնպես չէ, որ ազդեցությունը միանգամից լինում։ Ժամանակ է պետք, և այդ հաբի ներգործությունը հասնում է իր գագաթնակետին ինչ-որ ժամանակի։ Հետո սկսում է այդ հաբի ազդեցությունը նահանջել»,- ասաց նա։
Ըստ Արամյանի` մեզ մոտ այդ հաբի ազդեցությունը, այսպես ասած կառավարության գործողությունների ազդեցությունը տնտեսության զարգացումների վրա գնահատված է վեցից ինը ամիս։
«Նշանակում է, որ եթե ապրիլը դնենք մի կողմ, մարտ ամսվա գործողություններն իրենց ազդեցությունը դեռևս կշարունակեն թողնել մեր տնտեսական զարգացումների վրա, և պիկը կլինի դեկտեմբերը։ Դրանից հետո ազդեցության տեսանկյունից նահանջ կլինի»,- ասաց նախկին նախարարը։
Արամյանը նշեց նաև, որ, իհարկե, զուգահեռ սկսում է աշխատել նոր կառավարության գործողությունները։
«Որտե՞ղ են այն վախերը, որոնց պետք է ուշադրություն դարձնել։ Մեր կառավարությանը կհորդորեի, որ մեծ ուշադրություն դարձնեին դրանց։ Առաջինը` հաղորդակցությունն է հանրության և տնտեսավորողների հետ։ Սա շատ կարևոր է։ Երբ տնտեսվարողները կամ հանրությունը իրենց պահանջվող ինֆորմացիան չեն ստանում, նրանք թևակոխում են պահպանողական վարքագիծ։ Եվ դա կարող է հետագայում վնասել մեր տնտեսական աճի պոտենցիալին»,- ասաց նա։
Նրա խոսքով` ամեն դեպքում պետք է ուշադրություն դարձնել նաև բանկային համակարգի լիկվիդայնության վիճակին։
