ԵՐԵՎԱՆ, 19 սեպտեմբերի – Sputnik. Ճարտարապետները հավանություն են տվել Մոսկվայում ճարտարապետների միության հիմնադրի, ԽՍՀՄ ճարտարապետության ակադեմիայի փոխնախագահ Կարո Հալաբյանի պատվին հուշարձան կանգնեցնելու գաղափարին, հաղորդում է ՌԻԱ Նովոստին։
Մշակույթի և զանգվածային հաղորդակցությունների գծով Մոսկվայի պետական դումայի հանձնաժողովը սատարել է Սոկոլի շրջանում բնակելի տներից մեկի մերձակայքում Կարո Հալաբյանին արձան կանգնեցնելու առաջարկին։ Մի շարք ճարտարապետներ սեփական կարծիքն են հայտնել այդ կապակցությամբ։
Ճարտարապետ Վլադիմիր Պլոտկինը, օրինակ, հավանություն է տվել Հալաբյանի արձանի տեղադրման գաղափարին։
«Այդ ճարտարապետը մի շարք նշանակալի գործեր ունի, օրինակ, ռուսական բանակի թատրոնը», – իր վերաբերմունքը պարզաբանել է Պլոտկինը։
Իսկ Speech ճարտարապետական բյուրոյի ղեկավար Սերգեյ Չոբանը նշել է, որ նշանավոր նախագծողներին հիշելու ձգտումը հասարակության մեջ դրական միտում է։
Մյուս կողմից, ճարտարապետ Անդրեյ Ասադովի կարծիքով, նպատակահարմար է ոչ միայն արձաններ տեղադրել, այլև ճարտարապետներին նվիրված մշակութային կենտրոններ, փոքր թանգարաններ բացել։ Կարող է լինել նաև ճարտարապետի անվան հրապարակ կամ այլ քաղաքային հասարակական տարածք, որտեղ մարդիկ կարող են հաղորդակցվել միմյանց հետ։
«Նաև վատ չէր լինի, եթե օրինակ, Հալաբյանի անվան պուրակ կամ զբոսայգի հայտնվեր, այսինքն` մի բան, որ կապված է նրա գործունեության հետ», – առաջարկեց Ասադովը։
Կարո Հալաբյանը ծնվել է 1897 թվականին Ելիզավետպոլում (Կիրովաբադ)։ 61 տարվա ընթացքում մի շարք կարևոր նախագծեր է իրականացրել ոչ միայն Ռուսաստանի, որտեղ ստացել էր ճարտարապետի մասնագիտությունը, այլև հարազատ Հայաստանի համար։
