ԵՐԵՎԱՆ, 18 սեպտեմբերի — Sputnik. Թբիլիսիում ցորեն ներկրողները լայնածավալ բողոքի ակցիա էին կազմակերպել` Վրաստանի մայրաքաղաքի շրջաններից մեկում` Լիլոյում, փակելով ազատ տնտեսական գոտին։ Եթե երկրի իշխանությունները չփոխեն նախորդ որոշումը և չեղյալ չհայտարարեն ավտոտրանսպորտային միջոցներով ցորեն ներկրելու արգելքը, նրանք խոստանում են Վրաստանին իսկական շրջափակման մեջ գցել` կաթվածահար անելով բոլոր կենտրոնական մայրուղիները։ Այս մասին հայտնում է Rustavi 2 հեռուստաալիքը։
Թբիլիսին սեպտեմբերի 15-ից արգելք է մտցրել ավտոտրանսպորտային միջոցներով ցորեն կամ ցորենի ալյուր ներկրման կամ արտահանման համար, նոյեմբերի 1-ից այդ արգելքը կտարածվի նաև եգիպտացորենի վրա։
Բողոքի ակցիան արդեն երկրորդ օրն է ինչ ընթանում է, ներկրողները հրաժարվում են հանդիպել եկամուտների ծառայության ներկայացուցիչների հետ։ Լիլոյում Ազատ տնտեսական գոտու աշխատանքը շարունակում է կաթվածահար մնալ, ակտիվիստները պահանջում են չեղարկել բեռնատարներով ցորենի ներկրման արգելքը։
Նրանք անիմաստ են համարում անարդյունք հանդիպումները։ Նրանց պահանջը ցորենի ներկրման մասին որոշման մեջ փոփոխություններ մտցնելն է։ Եթե մինչև վաղը երեկոյան պահանջը չկատարեն, նրանք սպառնում են փակել բոլոր մեծ կենտրոնական մայրուղիները։ Ցուցարարները պնդում են, որ նման որոշման պատճառով 25 հազար մարդ անգործ է մնացել։
