ԵՐԵՎԱՆ, 18 սեպտեմբերի — Sputnik. Հայկական սահմանների գնդակոծության վերաբերյալ տեղեկատվությունը փոխանցվել է ԵԽԽՎ-ին։ Facebook սոցիալական ցանցում այս մասին գրել է ԵԽԽՎ-ում հայկական պատվիրակության ղեկավար, ԱԺ փոխխոսնակ Արփինե Հովհաննիսյանը
«Երեկ ԵԽԽՎ մոնիթորինգային հանձնաժողովի նիստում տեղեկացրել եմ Ադրբեջանի կողմից Կոթի գյուղի վրա կրակ բացելու, դրա հետեւանքով ՀՀ քաղաքացի Սուրեն Սեփխանյանի վիրավորվելու, ինչպես նաև Ադրբեջանի կողմից քաղաքացիական այլ բնակավայրերի գնդակոծման վերաբերյալ»,- գրել է նա։
Հովհաննիսյանը նշել է, որ օգտվելով Հայաստանի վերջին ներքաղաքական իրադարձություններից՝ ադրբեջանական իշխանությունները փորձում են ղարաբաղյան հակամարտության կարգավորման հնարավոր անհաջողությունները բարդել հայկական կողմի վրա։
«Բազմիցս ասել եմ և չեմ խորշի ևս մեկ անգամ կրկնել՝ արցախյան հարցում մենք ավելի քան միասնական ենք»,- ընդգծել է Հովհաննիսյանը։
Նա նշել է նաև, որ օրակարգին համապատասխան հանձնաժողովի խնդրանքով ներկայացրել է Հայաստանի վերջին ներքաղաքական զարգացումները։
Հաշվի առնելով հանձնաժողովի գործունեության գաղտնապահական կարգը՝ Հովհաննիսյանը կայացված որոշումների, հանձնաժողովի դիրքորոշման մասին կտեղեկացնի, երբ դրանք կգաղտնազերծվեն։
Հիշեցնենք` վերջին մեկ շաբաթվա ընթացքում Ադրբեջանական դիրքերից պարբերաբար գնդակոծության են ենթարկվում Տավուշի մարզի սահմանամերձ հայկական գյուղերն ու ավտոճանապարհները։
Սեպտեմբերի 14-ին ադրբեջանական զինված ուժերը գնդակոծել էին ՀՀ Տավուշի մարզի սահմանամերձ Չինարի գյուղի բնակելի տներն ու մանկապարտեզի շենքը։
Սեպտեմբերի 16-ի գիշերը Տավուշի մարզի Կոթի գյուղում ադրբեջանական կրակոցներից հրազենային վնասվածք էր ստացել գյուղի բնակիչ Սուրեն Սեփխանյանը։
