ԵՐԵՎԱՆ, 17 սեպտեմբերի – Sputnik. Yerevan.today–ի խմբագրությունում իրականացվող խուզարկությունները կապված են ԱԱԾ տնօրենի ու ՀՔԾ պետի գաղտնալսման հետ։ Այս մասին Sputnik Արմենիայի թղթակցի հետ զրույցում ասաց Քննչական կոմիտեի մամուլի խոսնակ Նաիրա Հարությունյանը։
«Քննչական կոմիտեում քննվող գործի շրջանակում քննչական գործողություններ են իրականացվում` ստուգումներ ոստիկանության վեցերորդ վարչության հետ Yerevan.today պարբերականի խմբագրության տարածքում», – ասաց Հարությունյանը։
Նրա խոսքով` ստուգումներն անցկացվում են ԱԱԾ ու ՀՔԾ ղեկավարների գաղտնալսման պատճառով։
Հիշեցնենք` օրեր առաջ Yerevan.today-ը հայտարարություն էր տարածել, որում ասվում էր.
«Yerevan.Today-ի հարգելի այցելուներ, համացանցում տարածվել է տեղեկություն, թե իբր մեր կայքը 2 օր առաջ, տեղադրել էր ԱԱԾ և ՀՔԾ ղեկավարների հեռախոսազրույցը` իբրև թե նախօրոք իմանալով: Ցուցադրվում են ինչ-որ «ապացույցներ»: Համացանցային փորձագետներն արդեն հերքել են դա՝ նշելով, որ Google համակարգում առկա է խնդիր: Բայց միևնույն է՝ լայնորեն տարածվում է կեղծ տեղեկությունը, որը վերածվում է մեր կայքի դեմ լայն հակաքարոզչության: Հայտնում ենք, որ ձայնագրությանը տեղեկացել ենք պատահական, սեպտեմբերի 11-ին, ճիշտ նույն ժամերին՝ 14:00 կողմերը, ինչպես մեր այլ գործընկերները և համացանցից օգտվողները: Կայքում տեղադրել ենք ժամը 15:00-ին մոտ, երբ այն արդեն լայնորեն տարածվել էր: Դրել ենք տեսանյութը սղագրելուց հետո միայն:
Հիշեցնենք` սեպտեմբերի 11–ին համացանցում հայտնվել էր Հայաստանի Ազգային անվտանգության ծառայության տնօրեն Արթուր Վանեցյանի և քննչական ծառայության պետ Սասուն Խաչատրյանի հեռախոսազրույցի ձայնագրությունը։ Ավելի ուշ պաշտոնյաները հանդիպեցին լրագրողների հետ ու տվեցին այդ խոսակցության շուրջ իրենց պարզաբանումները։
