Սեպտեմբերի 16-ի լույս 17-ի գիշերը ադրբեջանական զինուժը Տավուշի մարզում հերթական անգամ խախտել է հրադադարի ռեժիմը։ Այս մասին Sputnik Արմենիային հայտնել է ՀՀ ՊՆ մամուլի խոսակ Արծրուն Հովհաննիսյանը։
«Տավուշի հատվածում նորից խախտել են հրադադարի ռեժիմը։ Կրակել են տարբեր տրամաչափի զենքերից, հիմնականում աննպատակ կրակ է եղել, անհետևանք և մի փոքր ավելի քիչ, քան նախորդ օրը։ Տուժածներ չկան»,– ասաց Հովհաննիսյանը։
Նրա խոսքով` հայկական կողմի պատասխան կրակոցներից հետո կրակը դադարել է։
Վերջին շրջանում հաճախակիացած հրադադարի խախտման դեպքերը Արծրուն Հովհաննիսյանի դիտարկմամբ կարող են պայմանավորված լինել նաև գյուղատնտեսական աշխատանքների սեզոնով։
Ստեղծված իրավիճակի հարցով ՀԱՊԿ–ին դիմելու անհրաժեշտություն ՀՀ ՊՆ–ում չեն տեսնում։ «Իմաստ չունի։ Մենք մեր խնդիրը լուծում ենք»,– պատասխանելով Sputnik Արմենիայի հարցին`ասաց Արծրուն Հովհաննիսյանը։
Հիշեցնենք` վերջին մեկ շաբաթվա ընթացքում ադրբեջանական դիրքերից պարբերաբար գնդակոծության են ենթարկվում Տավուշի մարզի սահմանամերձ հայկական գյուղերն ու ավտոճանապարհները։
Սեպտեմբերի 14-ին ադրբեջանական զինված ուժերը գնդակոծել էին ՀՀ Տավուշի մարզի սահմանամերձ Չինարի գյուղի բնակելի տներն ու մանկապարտեզի շենքը։
Սեպտեմբերի 16–ի գիշերը Տավուշի մարզի Կոթի գյուղում ադրբեջանական կրակոցներից հրազենային վնասվածք էր ստացել գյուղի բնակիչ Սուրեն Սեփխանյանը։
