ԵՐԵՎԱՆ, 13 սեպտեմբերի — Sputnik. Հայտնի երգիծաբան Եվգենի Պետրոսյանը դատական կատարածուների ուղեկցությամբ այցելել է իր մոսկովյան բնակարան և սկսել է գույքագրել Ելենա Ստեպանենկոյի հետ համատեղ ձեռք բերած ունեցվածքը։ «Իզվեստիա» պարբերականի փոխանցմամբ` այս մասին այսօր հայտնել է երգիծաբանի փաստաբան Սերգեյ Ժորինը։
Իրավաբանի խոսքով` ապահարզանի գործընթացը սկսելուց հետո արտիստն առաջին անգամ է կարողացել մտնել սեփական բնակարան։ Ժորինը պարզաբանել է, որ Ստեպանենկոյին ու նրա պաշտպան Ելենա Զաբրալովային տեղեկացրել են գույքագրման մասին, բայց նրանք այդպես էլ չեն եկել նշված ժամին։
Համարվում է, որ այս բնակարանն ամուսինների համատեղ ունեցվածքի 50%-ն է։ Հենց այդ բնակարանում է գտնվում ունեցվածքի մեծ մասը։ Հայտնի է, որ երգիծաբանը պատրաստվում էր այստեղ սեփական թանգարան ստեղծել։
Պետրոսյանն ու Ստեպանենկոն ավելի քան 30 տարի է` ամուսնացած են։ Օգոստոսի 3-ին կինը հայց է ներկայացրել` 1,5 միլիարդ ռուբլի արժողություն ունեցող համատեղ ունեցվածքը բաժանելու պահանջով։ Նրա փաստաբանի խոսքով` Ստեպանենկոն համաձայն է ստանալ ունեցվածքի առնվազն 50%-ը։ Երգիծաբանը պատասխան հայց է ներկայացրել` ամուսնությունը չեղարկելու խնդրանքով։
Ավելի վաղ` սեպտեմբերի 10-ին, ՌԵՆ ՏՎ հեռուստաընկերության հետ հարցազրույցում Պետրոսյանն ասել էր, որ մինչև բնակարանը չգույքագրվի, ինքը չի կարող գնահատել այն, քանի որ երկար տարիների ընթացքում է կառուցել։ Սակայն հեռուստաընկերության տվյալով` Մոսկվայի կենտրոնում գտնվող շենքում ամուսինները մի քանի բնակարան ունեն։ Առաջինը 138 քառակուսի մետր մակերես ունի, որի արժեքը 47 միլիոն ռուբլի է։ Երկրորդն ավելի փոքր է` 92 քառակուսի մետր, և 37 միլիոն ռուբլի է գնահատվում։ Երրորդը 64 քառակուսի մետր է` մոտ 28 միլիոն ռուբլի արժեքով։
