ԵՐԵՎԱՆ, 12 սեպտեմբերի — Sputnik. Ռուսաստանը Հայաստանին 100 միլիոն դոլարի վարկ կտրամադրի։ Այս մասին այսօր լրագրողներին ասաց ՀՀ պաշտպանության նախարար Դավիթ Տոնոյանը։
Նա նշեց, որ նոր ռազմական վարկը կնքելու գործընթացը մեկնարկել է։
«Այս պահին իրավունք չունեմ մանրամասնելու զենքի տեսակները, ժամանակին դրա վերաբերյալ տեղեկություններ կհրապարակվեն»,-ասաց նախարարը։
Տոնոյանն ասաց, որ Հայաստանը կարևորում է բազմաֆունկցիոնալ ավիացիայի ներդրումը։
«Դա առաջնահերթություն է։ Բանակցություններ են ընթանում», — ասաց Տոնոյանը։
Հարցին` քանի ինքնաթիռ են նախատեսում գնել, նախարարը կեսկատակ ասաց. «Շատ»։
Տոնոյանը նշեց նաև, որ Հայաստանն ու Ռուսաստանը բավականին արդյունավետ համագործակցություն են իրականացնում։
Երևանն արդեն երկրորդ անգամ է վարկ ստանում ժամանակակից սպառազինություն և ռազմական տեխնիկա ձեռք բերելու համար։ 200 մլն դոլարի առաջին համաձայնագրով նախատեսված մատակարարումներն ավարտվել են։
