ԵՐԵՎԱՆ, 10 սեպտեմբերի — Sputnik. Հայաստանի վարչապետ Նիկոլ Փաշինյանն օրերս նշանակել է նոր օգնականի։ Նա ոճաբան Սոֆյա Նավասարդյանն է։
Հայ հասարակությունը միանշանակ չի ընդունել այդ նշանակումը։ Սոցիալական ցանցերի օգտատերերը կատակում են և գրում, որ պետք չէր բուհ ավարտել, քանի որ պետական պաշտոն ստանալու համար անհրաժեշտ են միայն վարսավիրի կամ դիջեյի հմտություններ (կառավարության աշխատակազմի ղեկավար Էդուարդ Աղաջանյանը հայտնի էր որպես ակումբի հիմնադիր և DJ Ed Ward)։ Ոմանք արդեն հայտարարում են, որ Փաշինյանն իր կնոջ վարսահարդարին օգնական է նշանակել, որպեսզի ավելի հեշտ լինի նրան տանել պաշտոնական ուղևորությունների և նա կարողանա հարդարել Աննա Հակոբյանի գանգուրները։
Դրա հետ կապված` վարչապետի մամուլի քարտուղար Արման Եղոյանն ասաց Sputnik Արմենիայի թղթակցին, որ Նավասարդյանը վարչապետի և նրա տիկնոջ ոճաբանն է և շարունակելու է զբաղվել նույն գործով։ Նա նշեց, որ դա աշխարհում տարածված փորձ է, երբ պետության ղեկավարը ոճաբան ունի։
«Նա զբաղվել և շարունակելու է զբաղվել նույն գործով, ինչ առաջ` այժմ արդեն լինելով վարչապետի օգնական: Ոչինչ չի փոխվել, ուղղակի նա նույն աշխատանքն անելու է օգնականի կարգավիճակով»,- ասաց Եղոյանը:
Նավասարդյանը չցանկացավ մեկնաբանություն անել իր նշանակման վերաբերյալ։ Նա ընդամենը հայտարարեց Sputnik Արմենիային, որ նշանակումն իր համար անակնկալ չի եղել։ Նրա խոսքով` դեռ վաղ է այդ մասին խոսելը և կոչ արեց սպասել մի քանի օր, մինչև չեն արվի որոշ պարզաբանումներ։ Եթե հավատալ կառավարության պաշտոնական կայքին, Նավասարդյանն արդեն ստանձնել է այդ պաշտոնը դեռ սեպտեմբերի 6–ին։
Ավելի վաղ Փաշինյանի կինը հայտարարել էր, որ որոշ մարդիկ իր հետ ծանոթ լինելն առավելություն են համարում անձնական հարցերը լուծելու համար։ Նա նշել էր` կարևոր չէ, թե ով և քանի անգամ է նրա հետ սուրճ խմել։ Այդ հանգամանքը ոչինչ չի փոխի նրանց կարիերայում։
