ԵՐԵՎԱՆ, 8 սեպտեմբերի — Sputnik, Աշոտ Սաֆարյան. Հայաստանի վարչապետ Նիկոլ Փաշինյանը չափազանց դրական գնահատեց Ռուսաստանի առաջնորդ Վլադիմիր Պուտինի հետ բանակցությունների ընթացքն ու արդյունքը։
Պուտինի հետ հանդիպումից հետո նա գրեց Facebook-ում. «Արդյունավետ զրույց ունեցանք, որի արդյունքներով կարող ենք արձանագրել, որ հայ-ռուսական հարաբերությունները փայլուն են: Մեր հարաբերություններում չկա ոչ մի պրոբլեմ, ոչ մի ուղղությամբ»:
Առաջիկայում պարզ կդառնա` այս գնահատականը հիմքեր ունի, թե ոչ:
Քաղաքագետ Նարեկ Գալստյանի կարծիքով՝ հանդիպման պաշտոնական մասից կարելի առանձնացնել երկու հետաքրքիր ասպեկտ: Առաջինը ներքին գործերին չմիջամտելն է: Հայաստանի վարչապետը, նշելով, որ երկու երկրների հարաբերություններ չկան անլուծելի խնդիրներ, շեշտել է, որ երկրու երկրները հենվում են միմյանց ներքին գործերին չմիջամտելու սկզբունքի վրա:
Երկրորդ պահը Հայաստանի պատրաստակամություն է ԵԱՏՄ-ի և ՀԱՊԿ-ի շրջանակում փոխգործակցությունը խորացնելու հարցում: Գալստյանը կարծում է, որ Հայաստանի նոր իշխանությունը, ձգտելով որոշակի որակական շտկումներ մտցնել երկկողմ հարաբերություններում, միաժամանակ հավատարմություն է ցուցադրում Մոսկվայի հետ միությանը՝ ի հեճուկս այն մտահոգության, որ այս ամիսներին արտահայտել են ռուսաստանյան քաղաքական և փորձագիտական օղակները:
«Նիկոլ Փաշինյանը պնդում է, որ արտաքին քաղաքականությունում կառուցվածքային փոփոխություններ չեն լինի: Բայց նա ակնկալում է հայ-ռուսական հարաբերությունների բովանդակալից ստուգում: Մասնավորապես, հարգել շահերը և չմիջամտել ներքին գործերին: Ներկա իշխանությունն ընդդիմության եղած ժամանակ հայտարարում էր, որ Հայաստանի և Ռուսաստանի հարաբերությունները չափազանց ասիմետրիկ են: Հիմա կձգտի որոշ շտկումների՝ միաժամանակ կասկածի տակ չդնելով այդ հարաբերությունների դաշնակցային ու ռազմավարական բնույթը: Իսկ ասիմետրիան ինչ-որ առումով բնական է՝ հաշվի առնելով երկու երկրների տարբեր քաշային կարգերը», — ասաց Գալստյանը:
Երկկողմ օրակարգում խնդրահարույց պահերից մեկը Հայաստանի պաշտպանության նախկին նախարար Միքայել Հարությունյանի հետ կապված սյուժեն է: Հայրենիքում նա մեղադրվում է 2008 հետընտրական բողոքի ակցիաների ժամանակ սահմանադրական կարգը տապալելու մեջ և հեռակա կարգով դատապարտվել է կալանքի, նրա նկատմամբ միջազգային հետախուզում է հայտարարվել: Սակայն օրերս Հայաստանի ոստիկանությունը հայտարարեց, որ գրավոր ծանուցում է ստացել ռուսական կողմից նախարարի նկատմամբ հետախուզությունը դադարեցնելու մասին: Այլ կերպ ասած՝ Մոսկվան նրան չի հանձնի:
Գալստյանն այս հարցի առնչությամբ կարծում է, որ շատ բան կախված է նրանից, թե ինչ հարցեր են քննարկվել Կրեմլում, և կհայտնվեն արդյոք նոր դրվագներ «մարտի 1-ի գործում»:
Նրա կարծիքով՝ իրական քաղաքականությունում մի բան է պահանջելը, մեկ այլ բան՝ այդ պահանջների իրագործմանը հասնելը: Հայաստանն այս իրավիճակում պետք է Ռուսաստանին ապացուցի իր կարևորությունն ու արժեքը՝ որպես այլընտրանք չունեցող գործընկեր: Փորձագետի կարծիքով՝ Հայաստանի իշխանությունն այդ ցանկությունն ու ձգտումը ունի, բայց տվյալ փուլում կաշկանդված է գալիք ԱԺ արտահերթ ընտրություններով:
«Մինչև Փաշինյանը չունենա իր իշխանության ինստիտուցիոնալ ամրապնդում, չարժե հույսը դնել լուրջ արտաքին քաղաքական նախաձեռնությունների վրա: Կարծում եմ, որ դա հասկանում է նաև Կրեմլը: Ուստի ինչ-որ առումով սպասողական դիրք է բռնել», — ասաց մեր զրուցակիցը:
Պատմական փորձը ցույց է տալիս, որ երկրում իշխանափոխությունից հետո որոշակի անորոշություն է առաջանում այդ երկրի և գործընկեր պետությունների հարաբերություններում:
