ԵՐԵՎԱՆ, 8 սեպտեմբերի — Sputnik. ՀՀ նախկին վարչապետ Հովիկ Աբրահամյանի դեմ քրեական գործ է հարուցվել 2 հոդվածով։ Այս մասին Sputnik Արմենիային հայտնեցին Հատուկ քննչական ծառայությունից։
Հովիկ Աբրահամյանին մեղադրանք է առաջադրվել Քրեական օրենսգրքի 309 հոդվածի 1-ին մասով՝ պաշտոնեական լիազորությունների չարաշահում, և ՔՕ 310 հոդվածով՝ ձեռնարկատիրական գործունեությանը ապօրինի մասնակցելը։
Այս հոդվածներով առաջադրված մեղադրանքները որևէ առնչություն չունեն Մարտի 1-ի գործի հետ։
Ավելի վաղ քննչական կոմիտեն հայտարարություն էր տարածել, որ «Ավազահատիկ» ընկերության տնօրենը հաղորդում էր ներկայացրել իրավապահներին, որի հիման վրա հարուցվել էր քրեական գործ, պարզվել է, որ 2000 թվականին հիմնադրված ընկերությունն Արարատի մարզում զբաղվել է հանքարդյունաբերությամբ՝ ներգրավելով վարկային միջոցներ, կատարել է շուրջ 80 հազար ԱՄՆ դոլարի ներդրում, ձեռք է բերել ավազի լվացման և մաղման հոսքագծեր։ Սակայն 2008 թվականին բարձրաստիճան պաշտոնատար անձինք ստեղծել են արհեստական խոչընդոտներ՝ պահանջելով ընկերության բաժնեմասերի 60 տոկոսը՝ նշելով, որ հակառակ պարագայում հանքերը չեն շահագործվի, ընդ որում, բաժնեմասերի 60 տոկոսը պահանջել են ձևակերպել երկու տարբեր անձանց անունով՝ յուրաքանչյուրին 30 տոկոս։
Ընկերության հիմնադիրը և այլ վկաներ իրենց ցուցմունքներում առերևույթ չարաշահումներին առնչություն ունեցած անձանց թվում մատնանշել են Հովիկ և Ջոնիկ Աբրահամյանների, Ալիկ Սարգսյանի անունները։
Քրեական գործով ձեռք են բերվել տվյալներ՝ օրենսդիր և գործադիր մարմինների ղեկավար ներկայացուցիչների կողմից պաշտոնեական լիազորություններն անցնելու, ինչպես նաև՝ նրանց կողմից խարդախություն կատարելու առերևույթ դեպքերի վերաբերյալ, որոշում է կայացվել քրեական գործն ուղարկել Հատուկ քննչական ծառայություն։
Հովիկ Աբրահամյանն այսօր հայտարարություն է տարածել այն մասին, որ իրեն հրավիրել են ՀՔԾ հարցաքննել են վկայի կարգավիճակում, այնուհետև մեղադրանք առաջադրել։ Խափանման միջոց է ընտրվել ստորագրությունը չհեռանալու մասին:
