ԵՐԵՎԱՆ, 6 սեպտեմբերի — Sputnik. Հայաստանն ու Ռուսաստանը ռազմատեխնիկական համագործակցությունը կառուցում են հաստատված պլանի համաձայն։
Այս մասին, ՌԻԱ Նովոստիի փոխանցմամբ, հայտնել է ռազմատեխնիակական համագործակցության գծով դաշնային ծառայության ղեկավար Դմիտրի Շուգաևը։
Հայաստանում տեղի ունեցած իշխանափոխությունը որևէ կերպ չի ազդել երկու երկրների ռազմատեխնիկական համագործակցության վրա։ Լրագրողների հարցին պատասխանելով, Շուգաևն ասաց, որ բոլոր այն պայմանագրերը, որոնք կնքվել են Ռուսաստանի և Հայաստանի միջև, գործում են։
Նշենք, որ վերջերս 200 մլն դոլարի հայ–ռուսական վարկային համաձայնագրով ավարտվեցին սպառազինության մատակարարումները։ Եվ 2017 թվականի հոկտեմբերի 24-ի միջկառավարական համաձայնագրի համապատասխան Ռուսաստանը հայկական կողմին ևս 100 մլն դոլարի չափով պետական վարկ կտրամադրի։
Բացի այդ, այս ոլորտում համագործակցելու վերաբերյալ հարցեր են քննարկվել վերջերս ՀՀ պաշտպանության նախարար Դավիթ Տոնոյանի Մոսկվա կատարած այցի ժամանակ։
