ԵՐԵՎԱՆ, 5 սեպտեմբերի — Sputnik. Ճիշտ է` կարող են լինել տարբեր կարծիքներ, բայց հավաքական են հրավիրվել այն ֆուտբոլիստները, որոնք համապատասխանում են մարզչական պահանջներին։ Այսօր` սեպտեմբերի 6-ին, կայացած ասուլիսի ժամանակ լրագրողներին ասաց Հայաստանի ֆուտբոլի հավաքականի գլխավոր մարզիչ Վարդան Մինասյանը։
Նա բացատրեց, թե ինչու հավաքականի կազմում ընդգրկված չէ ֆուտբոլիստ Յուրա Մովսիսյանը։
«Ես 10 օր առաջ զրուցել է Յուրա Մովսիսյանի հետ, ցանկություն եմ հայտնել, որ նա էլ մասնակցի հավաքականի առաջիկա խաղերին, բայց պայմանով, որ նա մեկ կամ երկու հանդիպում անցկացրած լինի իր ակումբի կազմում»,- ասաց Մինասյանը։
Սակայն Մովսիսյանն ապաքինվելուց հետո խաղային պրակտիկա չունի, քանի որ խաղային ակումբ չունի։
Հիշեցնենք, որ այս տարվա հունիսին վիրահատել էին ֆուտբոլիստի ոտքը։ Նա շվեդական «Յուրգորդենի» մեկնարկային կազմում մայիսի 18-ին Էրեբրուի դեմ խաղում լուրջ վնասվածք էր ստացել։
Մարզիչը հայտնեց նաև, որ հավաքականը մի քանի օրվա ընթացքում կորուստ է ունեցել։ Առաջիկա խաղերին չի մասնակցի Հրայր Մկոյանը, որովհետև ծնկի վնասվածք է ստացել, և չի բացառվում, որ նրան վիրահատեն։
«Հավաքական հրավիրված մյուս բոլոր ֆուտբոլիստները պատրաստ են խաղին»,- ասաց Մինասյանը` նշելով, որ զրուցել է բոլորի հետ և համոզվել, որ նրանք հոգեբանորեն պատրաստ են խաղին։
«Ամենակարևորն այն է, որ թիմը հոգեբանորեն է պատրաստ, որովհետև ֆուտբոլիստները պետք է անմնացորդ նվիրվեն խաղին, որպեսզի կարողանան արդյունք ապահովել»,- ասաց Մինասյանը։
Ըստ մարզչի` տղաները շատ լավ հասկանում են, որ խմբային փուլում 6 փոքրիկ եզրափակիչներ են լինելու, և յուրաքանչյուր խաղում նույնիսկ մեկ միավորի կորուստը կարող է շատ թանկ արժենալ։ Հետևաբար բոլոր խաղերում թիմը միայն մաքսիմալ արդյունք ունենալու համար է դաշտ դուրս գալու։ Հաշվի առնելով, որ այժմ թույլ հավաքականներ չկան, նրանց համառ ու անզիջում պայքար է սպասում։
Մինասյանը նշեց, որ առաջին մրցակցի` Լխտենշտեյնի հավաքականի խաղն ուսումնասիրել են, գիտեն ուժեղ և թույլ կողմերը։
«Մենք մեր խաղը կկառուցենք դրանք հաշվի առնելով»,- ասաց նա։
Ասուլիսին ներկա Արաս Օզբիլիսն էլ նշեց, որ շատ ուրախ է հավաքական վերադառնալու համար։ Ֆուտբոլիստը կամաց-կամաց բարելավում է մարզավիճակը և հուսով է, որ հավաքականում տիրող շատ լավ մթնոլորտը կօգնի առաջիկա խաղում հաղթելու գործում։
Սեպտեմբերի 6-ին Ազգերի լիգայի գավաթի շրջանակում Հայաստանի ֆուտբոլի հավաքականը «Հանրապետական» մարզադաշտում կխաղա Լիխտենշտեյնի, իսկ սեպտեմբերի 9-ին` մրցակցի հարկի տակ` Մակեդոնիայի հավաքականի հետ։
Հիշեցնենք, որ Վարդան Մինասյանն ավելի վաղ Հայաստանի ֆուտբոլի հավաքական էր հրավիրել 24 ֆուտբոլիստի։
