ԵՐԵՎԱՆ, 5 սեպտեմբերի – Sputnik. «Մարտի 1»-ի գործով մեղադրյալ Ռոբերտ Քոչարյանին հարցաքննելու անհրաժեշտություն չկար։ Այսօր լրագրողներին ասաց ՀՀԿ պատգամավոր, նախկին գլխավոր դատախազ Գևորգ Կոստանյանը։
«Անհրաժեշտությունը չեմ տեսնում, որովհետև այդ պահին առկա ապացուցողական բազայի շրջանակներում դու չես կարող քրեական գործի վերաբերյալ կարծիք կազմել ապրիորի, դու պետք է ունենաս կոնկրետ իրավիճակում քրեական գործի վարույթը տվյալ ժամանակահատվածում: Դու չգիտես, թե մեկ տարվա կամ երկու տարվա ընթացքում ինչ ապացույցներ են ձեռք բերվել»,-ասաց նա։
Կոստանյանը հիշեցրեց, որ ինքը 2016-ի օգոստոսի 4-ից Հայաստանի գլխավոր դատախազը չէ և չգիտի՝ դրանից հետո ինչ քննություն են իրականացրել, ինչ ապացույցներ են ձեռք բերել, որ դրա անհրաժեշտությունն է առաջացել։
Միաժամանակ Կոստանյանը նշեց, որ ինքն ուրախ կլինի, եթե Մարտի 1-ի գործը բացահայտվի։
