ԵՐԵՎԱՆ, 5 սեպտեմբերի — Sputnik. ԱԺ արտահերթ ընտրություններ անցկացնելու նպատակով Հայաստանի Ազգային ժողովի ինքնալուծարման համար իրավական հիմքեր չկան։ Այդ մասին չորեքշաբթի լրագրողներին ասաց նախկին գլխավոր դատախազ, Հայաստանի Հանրապետական կուսակցության պատգամավոր Գևորգ Կոստանյանը։
«Կառավարման խորհրդարանական համակարգով երկրներում խորհրդարանն առաջնային մանդատով մարմին է, քանի որ ընտրվում է համազգային քվեարկության ճանապարհով` ի տարբերություն կառավարության։ Հետևաբար, խորհրդարանն ունի պաշտպանվածության որոշակի երաշխիքներ սահմանադրական իրավունքին համապատասխան», — ասաց Կոստանյանը։
Խորհրդարանները, որպես կանոն, ցրվում են անգործունակության պատճառով։ Օրենսդիր մարմնի ինքնալուծարումն արտահերթ ընտրություններ անցկացնելու նպատակով գրված չէ սահմանադրական իրավունքում։
«Խորհրդարանի լուծարման համար պետք է պայմաններ լինեն։ Այդ պայմանները սահմանվում են սահմանադրությամբ կամ օրենքներով», — նշեց պատգամավորը։
Կոստանյանը համաձայն է, որ Հայաստանում իրավիճակն օրինաչափ չէ. վարչապետը ներկայացնում է այն քաղաքական ուժը, որը փոքրամասնություն է, իսկ խորհրդարանում մեծամասնություն է կազմում ընդդիմությունը։
«Դա ֆորս մաժոր չէ, ուղղակի ոչ օրինաչափ իրավիճակ է: Ֆորս մաժորն այն է, երբ խորհրդարանն անգործունակ է։ Հետևաբար, այո, ունենք ոչ օրինաչափ իրավիճակ, որը մեխանիկորեն, եթե պետք է հանգեցնի պառլամենտի ինքնալուծարման, իրավունքի տեսակետից ես արդարացված չեմ համարում, քաղաքական տեսակետից ամեն ինչ էլ կարող է լինել ես դա չեմ բացառում»,-ասաց նա։
Կոստանյանը կտրականապես հրաժարվեց քաղաքական գնահատական տալ վարչապետ Նիկոլ Փաշինյանի` խորհրդարանն ինքնալուծարելու գաղափարին։ Նրա խոսքով, երբ սահմանադրությունում շտկումների համապատասխան նախագիծը ներկայացնեն խորհրդարանի քննարկմանը, այդ ժամանակ նա կարտահայտի իր վերաբերմունքը քվեարկության ընթացքում։
Հիշեցնենք, որ Փաշինյանն ավելի վաղ հայտարարել էր խորհրդարանն ինքնալուծարելու անհրաժեշտության մասին, եթե վարչապետը հրաժարական տա արտահերթ խորհրդարանական ընտրությունների նախաշեմին։ Փաշինյանը մտավախություն ունի, որ վարչապետի բացակայության պայմաններում խորհրդարանը, որտեղ մեծամասնություն են կազմում հանրապետականները, կարող է ընտրել ՀՀԿ-ին հարմար թեկնածուի։
