ԵՐԵՎԱՆ, 4 սեպտեմբերի – Sputnik. ՀՀ վարչապետ Նիկոլ Փաշինյանը ՀՀ երկրորդ նախագահ Ռոբերտ Քոչարյանի ծննդյան տարեդարձի կապակցությամբ ՌԴ նախագահ Վլադիմիր Պուտինի շնորհավորանքի մեջ քաղաքական ենթատեքստ չի տեսնում։ Այս մասին նա ասաց այսօր՝ սեպտեմբերի 4-ին, լրագրողների հետ զրույցում։
«Անձնական հարաբերությունների խնդիր է։ Հասցնելով ճանաչել ՌԴ նախագահին` կարող եմ ասել, որ նա մարդկային կապերը շատ է գնահատում է և պահպանում է աշխարհի տարբեր երկրների ներկա և նախկին ղեկավարների հետ»,- ասաց Փաշինյանը։
Որպես ապացույց նա հիշեցրեց, որ ՌԴ նախագահը վերջերս մասնակցել էր Ավստրիայի արտաքին գործերի նախարար Կարին Կնայսլի հարսանյաց արարողությանը` չնայած Եվրամիության հետ խնդրահարույց հարաբերություններին։
«Դուք տեսաք, որ վերջերս, չնայած ԵՄ-ի հետ բավականին պրոբլեմատիկ հարաբերություններին, նա մասնակցեց Ավստրիայի բարձրաստիճան պաշտոնյայի հարսանյաց արարողությանը, ինչը նշանակում է, որ մարդկային կապերը նրա համար առանձնահատուկ նշանակություն ունեն»,- ասաց Փաշինյանը։
Լրագրողների դիտարկմանը, թե Պուտինը 10 տարի չէր շնորհավորել Ռոբերտ Քոչարյանին, Փաշինյանը կատակեց. «Ես, ճիշտն ասած, ձեր նման ուշադիր չեմ հետևում վիճակագրությանը»։
Հիշեցնենք, որ Պուտինը Քոչարյանին էր զանգել օգոստոսի 31-ին։
Փաշինյանը խոսեց նաև ՌԴ նախագահի հետ կայանալիք հանդիպման մասին։ Նրա խոսքով` հանդիպման օրակարգում կլինեն երկկողմ հարաբերությունների ամբողջ սպեկտորը։
Պատասխանելով Լավրովի հայտարարության մասին հարցին, թե ՀՀ-ում իրավիճակը շարունակում է «եռալ», Փաշինյանը կատակեց. «Դե իսկապես շոգ էր այսօր»։
Հիշեցնենք, որ Հայաստանի վարչապետ Նիկոլ Փաշինյանն ու Ռուսաստանի Դաշնության նախագահ Վլադիմիր Պուտինը հանդիպելու են սեպտեմբերի 8-ին Մոսկվայում:
