ԵՐԵՎԱՆ, 3 սեպտեմբերի — Sputnik. Վրաստանը նվազեցրել է ցորեն ներկրելու և տարանցելու սակագինը հայ փոխադրողների համար: Այդ մասին հաղորդում է «Ինտերֆաքսը»` հղում անելով «Վրացական երկաթուղի» բաժնետիրական ընկերության մամուլի ծառայությանը։
Բեռնատարներով ցորեն տեղափոխելու արգելքը սահմանելուց հետո երկաթուղով տեղափոխելու սակագինը կնվազի գրեթե մեկ երրորդով ։
Փոթի սևծովյան քաղաք-նավահանգստի կայարանից Սադախլո կայարան (հայ-վրացական սահման) 150 հազար տոննա և ավելի ցորեն ու ցորեն-տարեկանի ալյուր տեղափոխելը կնվազի 30 տոկոսով։ Այսպիսով, հայկական ընկերությունները մեկ տոննայի համար կվճարեն 12,38 դոլար։
Տեղափոխման արտոնյալ գինը կգործի մինչև 2019թ-ի վերջ։
Ավելի վաղ հայտնի էր դարձել, որ սեպտեմբերի 1-ից «Հարավկովկասյան երկաթուղի» ՓԲԸ-н նույնպես նվազեցրել է երկաթուղային տրանսպորտով Փոթի-Հայաստան ուղղությամբ հացահատիկային բեռներ փոխադրելու սակագները։
Հիշեցնենք` Վրաստանի կառավարությունը արգելել է Լարսի անցումով խոշոր բեռնատար ավտոմեքենաներով ցորենի և ալյուրի փոխադրումները` դրա փոխարեն առաջարկելով օգտվել Փոթիի նավահանգստից և երկաթուղուց։
Վրաստանի իշխանությունների այս որոշումն ուժի մեջ է մտնելու սեպտեմբերի 15-ից։
