ԵՐԵՎԱՆ, 3 սեպտեմբերի – Sputnik. Մոսկվայի ոստիկանությունը պարզել է աղմկահարույց դեպքի հանգամանքները և բերման ենթարկել Արտակ Աղաջանյանին, որը մեղքը չի ընդունում: Այս մասին հայտնում է Mash տելեգրամ–ալիքը։
Հիշեցնենք, որ օգոստոսի 31-ին Մոսկվայի հարավ–արևելքում մի ճամպրուկ էին գտել, որում 18-25 տարեկան աղջկա դիակ էր հայտնաբերվել։ Նմանատիպ գործ էր հարուցվել օգոստոսի սկզբին, երբ Վորոնցովյան այգում մի ճամպրուկ էին գտել, մեջը` կնոջ դիակ։
Տելեգրամ–ալիքն այս երկու դեպքերը կապում է իրար հետ և գրում. «Պատահական անցորդը դիմել է ոստիկանություն. տղամարդը զբոսնում էր Կրեմլյան կուրսանտների ծառուղով, երբ թփերի մեջ մեծ ճամպրուկ էր տեսել։ Ճամպրուկը կասկած էր առաջացրել և տղամարդը զանգել էր ոստիկանություն։ Քիչ անց ոստիկանության աշխատակիցները դեպքի վայր էին ժամանել։ Ճամպրուկը զգուշորեն բացել էին ու մեջը կնոջ դի հայտնաբերել։ Բռնության հետքերը բացակայում էին։ Ոստիկանությունը սկսել էր փնտրել կասկածյալին։ Բանն այն է, որ մի քանի ամիս առաջ մայրաքաղաքի հարավ–արևմուտքում նման ճամպրուկ էին գտել։ Մեջը տարեց կնոջ դիակ էր, առանց բռնության արտաքին նշանների։ Ճամպրուկային մոլագարի մասին լուրեր էին տարածվել»։
Պարբերականի տվյալներով` դատաբժշկական փորձագետներն աղջկա մարմնի վրա դանակահարության հետք էին հայտնաբերել, ինչը և մահվան պատճառ էր դարձել։ Իսկ տարեց կինը մահացել էր սրտի կաթվածի հետևանքով։
«Այսօր այդ պատմության գոնե մի մասը կարծես հանգուցալուծվել է։ Ոստիկանները ձերբակալել են սպանության մեջ կասկածվողին։ Կասկածյալը նրա հարևան սենյակն էր վարձակալում։ Ձերբակալվածը` Արտակ Աղաջանյանը, չի ընդունում իր մեղքը։ Իսկ ահա ճամպրուկի մեջ հայտնաբերված տատի պատմության մասին ոչինչ հայտնի չէ», – գրում է պարբերականը»։
