ԵՐԵՎԱՆ, 1 սեպտեմբերի — Sputnik. Երևանի քաղաքապետարանի աշխատակազմի տուրիզմի բաժնի նախաձեռնությամբ Երևանի հիմնադրման 2800-ամյակի առթիվ Երևանում գտնվող ճապոնացի հանրահայտ արվեստագետ, պրոֆեսոր Կունիտո Նագաոկան պատճենել է Երևանի «անձնագիր» համարվող ուրարտական սեպագիր արձանագրությունը, որը պահպանվում է «Էրեբունի» պատմահնագիտական թանգարանում: Այս մասին հայտնում է Երևանի քաղաքապետարանի մամուլի ծառայությունը։
![Подарок японского художника Еревану по случаю 2800-летия столицы Подарок японского художника Еревану по случаю 2800-летия столицы - Sputnik Արմենիա](https://cdn.am.sputniknews.ru/img/1419/83/14198307_0:0:1600:1067_600x0_80_0_0_cc74c8aa3c711bb8a298fa2fdf7499be.jpg)
Արվեստագետը չինական ավանդական Տակու-Հոն դրոշմատպման եղանակով արտատպել է արձանագրությունը, ինչպես նաև Երևանի պատմության թանգարանում գտնվող հայտնի խաչքարի մեկ օրինակ:
Հարկ է նշել, որ այդ տեխնիկային այսօր հիմնականում տիրապետում են ճապոնացիները: Դրոշմատպման համար օգտագործվել է բարակ և ամուր թուղթ (բնական թելատու բույսերից պատրաստված) և համապատասխան ստվերաներկ (տուշ): Երևանում արվեստագետը օգտագործել է ճապոնական «տանգո» տիպի թուղթ, որը պատրաստվում է հատուկ պատվերով: Յուրաքանչյուր ձեռագործ դրոշմատիպ համարվում է բնօրինակ և արվեստագետի ստորագրությունն է կրում:
![Подарок японского художника Еревану по случаю 2800-летия столицы Подарок японского художника Еревану по случаю 2800-летия столицы - Sputnik Արմենիա](https://cdn.am.sputniknews.ru/img/1419/82/14198237_0:0:1600:1066_600x0_80_0_0_e718158f9ef1f7e62adafcea56d52b60.jpg)
«Ես տպավորված եմ հայերի մշակութային, հոգևոր ավանդույթներով և ուզում եմ կենդանացնել ու փաստագրել հին խաչքարերի առաքելությունն իբրև քարե դրոշմատիպեր՝ նրանց վերադարձնելով ժամանակակից աշխարհ` իրենց ձևերի ամբողջ հարստությամբ և փորագրությունների ողջ նրբությամբ: Հատուկ ուզում եմ նշել, որ Երևանի հիմնադրման սեպագիր արձանագրությունը 21-րդ դարում յուրօրինակ արվեստի գլուխգործոցի մաս կարող է կազմել, չնայած, որ այն արվել է հազարամյակներ առաջ»,- նշել է ճապոնացի արվեստագետը:
Աշխատակազմի տուրիզմի բաժնի պետ Գևորգ Օրբելյանը, ողջունելով և շնորհակալություն հայտնելով ճապոնացի արվեստագետին նման յուրօրինակ նվերի համար, նշել է. «Երևանի համար այս տարին հոբելյանական է, և յուրօրինակ այս նվերներն իսկապես խորհրդանշական են մայրաքաղաքի համար: Ըստ այդմ, դրանք անպայման կդառնան այլ երկրներում նախատեսվող ցուցահանդեսների կարևոր բաղադրիչներ՝ օտարազգիներին առավել հանգամանորեն ներկայացնելով հայկական մշակույթը»:
![Подарок японского художника Еревану по случаю 2800-летия столицы Подарок японского художника Еревану по случаю 2800-летия столицы - Sputnik Արմենիա](https://cdn.am.sputniknews.ru/img/1419/81/14198121_0:0:1600:1067_600x0_80_0_0_1741443dd63e16af9149374e4d3dd14a.jpg)
Ճապոնացի պրոֆեսորը արտատպած օրինակները հանձնել է Երևանի պատմության և «Էրեբունի» պատմահնագիտական թանգարաններին:
![Подарок японского художника Еревану по случаю 2800-летия столицы Подарок японского художника Еревану по случаю 2800-летия столицы - Sputnik Արմենիա](https://cdn.am.sputniknews.ru/img/1419/84/14198405_0:0:1600:1067_600x0_80_0_0_9cf0436febe9b3131d3ee30a77cdf52e.jpg)