ԵՐԵՎԱՆ, 31 օգոստոսի — Sputnik. «Հայաստանի օրեր» միջոցառումը, որոնք առաջին անգամ կանցկացվեն սեպտեմբերի 2-3-ը, նվիրված կլինեն հայ մեծ կոմպոզիտոր Արամ Խաչատրյանի 115-ամյակին։ Այս մասին Sputnik Արմենիայի թղթակցի հետ զրույցում ասաց միջոցառման նախաձեռնող և կազմակերպիչ Վրույր Փենեսյանը։
«Արամ Խաչատրյանն առաջին հայն է, որը ելույթ է ունեցել Մոնտե Կառլոյի օպերային թատրոնի բեմում։ Դա եղել է 1974 թվականին իշխան Ռենյե III-ի և նրա կնոջ` Գրեյս Քելիի հրավերով։ Դրանից մեկ տարի առաջ նրանք ջերմությամբ ընդունել են կոմպոզիտորին։ Բացի այդ, 2003 թվականին Մոնակոյում Խաչատրյանի 100-ամյակին նվիրված նամականիշ է թողարկվել». — պատմեց Փենեսյանը։
Միջոցառման նախաձեռնողի խոսքով` հենց այդ պատմական փաստն է պատճառ դարձել, որ «Հայաստանի օրերը» մեկնարկեն կոմպոզիտորի հոբելյանին նվիրված համերգով։
«Սեպտեմբերի 2-ին հենց այնտեղ, որտեղ շատ տարիներ առաջ ելույթ է ունեցել մաեստրոն, Մոնտե Կառլոյի օպերային թատրոնի «Գառնյե» դահլիճում համաշխարհային ճանաչում ունեցող օպերային երգչուհի Հասմիկ Պապյանի և մի շարք միջազգային երաժշտական մրցույթի դափնեկիր, դաշնակահարուհի Նարե Արղամանյանի մասնակցությամբ բարեգործական համերգ կանցկացվի», — նշեց նա։
Փենեսյանն ընդգծեց, որ «Հայաստանի օրեր» միջոցառման ծրագիրը բավականին հագեցած է։
«Հաջորդ օրը «Մետրոպոլ» հյուրանոցում հայկական կոնյակի և հայկական գինիների լավագույն տեսակների համտես կանցկացվի։ Այդ միջոցառման պատվավոր հյուրն է ֆրանսիահայ սոմելյե Արմանդ Մելքոնյանը», — ասաց նա։
Համտեսի ընթացքում հյուրերը կկարողանան վայելել Լևոն Չատիկյանի դուդուկի կատարումները։
Բացի այդ, Մոնակոյում «Հայաստանի օրերի» շրջանակում նորաձևության ցուցադրություն կանցկացվի, որին կմասնակցեն հայ դիզայներները։