ԵՐԵՎԱՆ, 30 օգոստոսի — Sputnik. Այս տարի երեխային կարելի է դպրոցի ուղարկել առանց ավելորդ ծախսերի։ Այս մասին լրագրողների հետ հանդիպմանն ասաց «Սպառողների խորհրդատվության կենտրոն» ՀԿ-ի նախագահ Կարեն Չիլինգարյանը:
Առաջին դասարանցուն համապատասխան հագուստ գնելու և պայուսակը լցնելու համար ամենաքիչը 30-35 հազար դրամ է հարկավոր։ Այդպես էր նաև նախորդ տարի։
Մասամբ պատճառն այն է, որ վերջին տարիներին ծնողները սկսել են դպրոցական իրեր գնել ոչ թե օգոստոսի վերջին շաբաթվա ընթացքում, այլ մեկ–մեկուկես ամիս առաջ։ Խանութներում հերթեր չկան, այդ պատճառով վաճառականները գները չեն բարձրացնում։
Իսկ որն է ճիշտ`արդյո՞ք ազատ հագուստով դպրոց գնալ, ինչպես առաջարկում է կրթության նախարարը, թե համազգեստ ընտրել։ Չիլինգարյանի կարծիքով` սրան միանշանակ պատասխանել հնարավոր չէ։ Այնուամենայնիվ, ըստ նրա, ազատ հագուստը կարող է բարելավել հոգեբանական մթնոլորտը ուսումնական հաստատություններում։
Նշենք` օրերս ՀՀ կրթության նախարար Արայիկ Հարությունյանը հայտնել էր, որ պետք չէ պարտադրել դպրոցականներին սև–սպիտակ հագնել։
Նախարարը համոզված է, որ երեխաները պետք է հասարակ ու հարմարավետ հագուստով դպրոց գնան։ Հարությունյանը կոչ է արել այդ թեման չշահարկել ու հանգիստ սեպտեմբերի 1–ին պատրաստվել։
